Pasco y aña nobo ta un temporada di reflexion rond mundo y na Aruba tambe. Sinembargo e ta un temporada hopi druk pasobra ta ‘high season’. Pues, ora bo ta lesa den prensa cu net den e temporada aki Gobierno ta propone un ley nobo cu kier controla tur media y limita nos derecho de expresion (1), mi no por keda sin corda riba e “Lista di 10 rekisitonan pa mina un democracia”.

Por busca nan pa bo mes riba Google, pero akinan mi ta splica con esaki a wordo implementa na Aruba na un manera refina.

Destrui credibilidad di sindicatonan (2)

Na prome lugar riba e lista (e di dos menciona den e articulo aki) ta destruccion di e credibilidad di sindicatonan. Pa asina kibra e oportunidad pa trahadornan por negocia un salario mas halto, bringa conhuntamente contra inhusticia, pa asina crea menos oportunidad pa pueblo por forma un bloque sindical contra Gobierno. E ta e prome cos cu e lidernan di e pais aki a haci na maart 2020 ora a ignora e sindicatonan.

Riba tur media nos por a scucha mentira, cu e sindicatonan no tabata kier coopera. A usa media pa pone sector priva contra sector publico y gaña tocante ken a propone e 12.6%, cual manera a keda prueba durante un caso den corte na St Maarten, tabata Gobierno di Aruba mes. Y awor kier bin cu un ley di media pa limita nos derecho di expresion?

Crea miedo (3) y inseguridad financiero (4) den pueblo

Numero 3 y 4 ta sumamente importante. Un Gobierno dictatorial ta indoctrina pueblo, prome cu ta manifesta su mes como ‘e salbador omnipotente’(5). E crisis economico cu Covid a causa mundialmente a causa miedo den pueblo henter y asina a crea un tera fertil pa Gobierno por a manipula pueblo. E crisis tabata devastador pa e economia di Aruba y e inseguridad financiero a trece pobresa. Gobierno a haci como si fuera nan ta e salbador pa e sector priva cu FASE y loonsubsidie, pero tambe door di baha salario di sector publico cu 12.6%.

Caminda otro pais den Reino a cuminsa corta salario obligatoriamente 7 luna pasa na mei 2021, Gobierno di Aruba a wak un oportunidad pa hinca miedo y inseguridad financiero den pueblo henter net un aña prome cu eleccion y pa 21 luna caba. Nan a probecha di tur media pa logra nan meta.

Manipula eleccion (6) y elimina bo oponentenan politico (7)

Nos tur sa cu Minister President a baha Gobierno dia 30 di maart 2021, pa evita cu tur partido por a prepara debidamente pa eleccion. Manipula eleccion ta un di a maneranan mas grave pa mina democracia. Bo ta demostra cu bo no ta respeta democracia ni pueblo. Esey tabata cla manera un cristal, durante henter e proceso di colecta firma te cu contamento di voto.

Unico manera pa preveni esaki, ta pa invita no Hulanda, pero Nacionnan Uni pa supervisa nos eleccion den futuro. Aunke na Aruba no a likida ningun contrincante politico, e asesinato di caracter di esnan cu ta lucha pa pueblo den politica, pa asina elimina corupcion, ta algo di berdad y cu mi mes tambe a experiencia. E ora ey si e ta ok pa Gobierno usa e mesun media pa logra nan meta.

E tres otro maneranan pa mina democracia y crea un dictadura

Tene e nivel di educacion abou (8): Na Aruba Gobierno no ta respeta e derecho di mucha: “Tur mucha tin derecho riba educacion den nan idioma materno”, conforme e Tratado Internacional di Derecho di Mucha (IVRK). Censo 2020 ta mustra cu 92% di esnan cu a nace na Aruba ta papia Papiamento na cas. Tanten cu ta sigui usa Hulandes como idioma di instruccion na scol, e potencial di e gran mayoria di nos muchanan y pueblo henter no lo keda desaroya debidamente.

Mantene e ‘Braindrain’ (9): Limita e oportunidad di trabou pa esnan cu a studia (den exterior) y asina demotiva esnan cu ta aspira pa bay studia. Ora no tin trabou, of solamente trabou pa friends and family, nepotismo, esnan cu a studia no por regresa na un trabou cu por paga nan debe di studio. Contracto lucrativo (10): Neglisha reglanan di Bon Gobernacion y cera contracto lucrativo di 20 aña y pa 1,5 biyon of mas, cu ta cay na fabor di famia y stakeholders, mientras ta crea debe riba lomba di pueblo.

Pa clausura mi ta pidi pueblo humildemente, pa tene e 10 puntonan aki riba menciona, den mente. Pueblo so por salba Aruba di cualkier Gobierno dictatorial refina, estilo siglo 21, cu ta mina nos democracia. Den nomber di partido Pueblo Prome, mi ta desea tur hende hopi bendicion, salud, forsa, amor, prosperidad y specialmente sabiduria pa aña 2022.