Partido Pueblo Prome (PP) a wordo acerca door di habitantenan den vicendario di Parkietenbos tocante iregularidad administrativo cu ta tuma lugar. Ta toca e peticion di Serlimar pa un permiso un ‘hindervergunning’ pa cu trabounan di sanacion di e landfill Parkietenbos y e supuesto mal maneho cu Minister di Naturalesa Ursull Arends ta ehecuta. 

Na prome lugar e caminda di e procedura cu Minister Ursell Arends kier cana, ta uno cu ta parce ilegal, asina partido PP a keda informa. Como cu a opta pa no scoge e procedura caminda Raad van Advies lo por controla e procedura y duna conseho. Ademas, e peticion ta falta informacion clave manera un extracto di KvK di Serlimar y e pintura riba escala 1:250, e falta garantia pa cu e salud di e habitantenan (asbestos y stof), un garantia financiero y mucho mas. Puntonan cu un Gobierno integro no por salta den su maneho pa un proyecto asina grandi.

Partido Pueblo Prome tambe a ricibi un copia di y carta di objecion dirigi na DIP y na nos representantenan di pueblo  den Parlamento. Caminda abogado y activista pa derecho humano, salud y medio ambiente, Sra. Anouk Balentina, a eherce un investigacion huridico y amplio. Un investigacion riba e procedura di aplicacion, di e contenido  tecnico di e plan di sanacion y base  huridico necesario pa por suministra e permiso aki. Den su carta di obhecion el a hasta splica, demostra y informa tur 21 Parlamentario pa di dos biaha riba nan responsabilidad y e herment huridico cu nan por uza pa sali na defensa di pueblo.

E ta inimaginabel cu te awe ningun partido politico/parlamentario a demostra cu e ta tuma su funcion pa proteha e derechonan di pueblo en general y specificamente di esnan cu lo sali mas afecta door di e plan di sanacion di dump, na serio. Como cu e biento cu nos tin na Aruba, lo encera cu un gran parti di e poblacion di Aruba, incluso nos turistanan cu awendia ta ubica tur rond di Aruba, ta core peliger, ta crea un problema adicional pa cu e unico pilar economico cu Aruba a resta: turismo.

Ademas, Aruba no conose e ‘Hoog College van Staat’ Ombudsman, aunke cu e ley di Ombudsman a keda aproba na september 2020. Esaki kiermen cu e responsabilidad di cada un Parlamentario pa actua ta hopi mas grandi! Partido Pueblo Prome, como partido pafor di Parlamento, lo sigui haci tur cos den su poder pa percura cu e caso aki lo haya su debido atencion, lo sostene pueblo y Sra. Balentina den su lucha pa salud, medio ambiente y bon gobernacion. Partido PP lo garantisa cu e Minister di Naturalesa y cualkier otro Minister cu ta envolvi den e caso aki, un caso cu ya caba ta mustra di ta bay den direccion di mal gobernacion intencional, lo no logra perhudica e habitantenan den vecindario di Parkietenbos, e poblacion di Aruba henter, nos economia y e futuro di nos muchanan. Nos ta conseha pa henter Aruba participa na e accion di firma contra e maneho iresponsabel di Minister Ursell Arends pa cu e sanacion di Parkietenbos door di Serlimar.