Den pasado e mundo di fitness y bodybuilding tabata ser mira como un hobby of deporte di hende homber. Tin damanan den comunidad cu ta demostra cu esaki ta algo cu ta empodera e ser femenino. Gisela Erasmus ta un dama cu ta involucra den e mundo di fitness y ta pone su mes disponible pa yuda e hende muhe cu kier eleva nan auto estima, seguridad y amor propio.

Durante su participacion den e proyecto di generacionnan di hende muhe den e mundo di bodybuilding, realisa pa e atleta profesional di bodybuilding, Mervine Kock, Erasmus a conta Bon Dia Aruba con el a involucra su mes den e mundo aki.

El a conta cu semper e tabata den fitness. Henter su bida, desde su infancia el a stima e hobby y eventualmente el a drenta den e mundo di gym, el a cuminsa train te cu el a cuminsa tuma lesnan y a cualifica como fitness instructor y personal trainer. El a cuminsa duna les y asina hopi aña a pasa, mas cu 30 aña caba, cu e ta dunando les.

Erasmus a remarca cu a a pesar di su amor pa fitness, e no a pone su mesun curpa como prioridad, si no el a enfoca mas tanto pa traha cu hende muhe den situacionnan caminda cu nan no kier bay gym. “Mi a cuminsa yuda nan y asina e crecemento a sigui y mi a keda activo dunando les,” el a bisa.

Te cu ainda, a pesar di tin mas di 30 aña cu e tin involucra den e mundo di fitness y bodybuilding, e no a yega di subi un escenario pa competi.

“Mi ta rondona cu tur esnan cu si ta competi y nan influencia ta super positivo, nan a yuda mi asina hopi, nan a motiva mi, nan a pusha mi masha duro, dus ken sa. practicamente mi ta den e practica pa yega eynan y cu Dios su poder otro aña nos ta wak kico lo pasa,” Erasmus a subraya.

No ta un secreto cu e practica di fitness y bodybuilding ta rekeri hopi disciplina, pero pa Erasmus e disciplina mental ta un factor cu hiba na hopi beneficio, no solamente den e parti fisico, pero tambe den otro areanan di bida.

“Bo ta keda mantene bo mes disciplina mentalmente, bo por pusha mas den tur situacion den bida, no solamente bo curpa, pero emocional y mental pasobra nos ta pasa den hopi situacionnan a diario como hende muhe, nos ta enfrenta hopi desafio a diario, nos ta enfrenta hopi cos y nos ta experiencia hopi cos y ta activo den un gym haciendo ehercicio e ta yuda bo curpa kita stress, e ta yuda bo enfoca, e ta yuda bo pusha mas pa bo metanan personal. Pa mi e tabata semper di gran beneficio y mi kier anima tur hende cu kier cuminsa, it’s never too late,” el a enfatisa.

Te cu ainda tin hopi hende muhe cu tin miedo of berguensa pa drenta den un gym of pa drenta den e mundo di fitness. Esaki ta algo cu Erasmus, como hende muhe cu experiencia den e mundo aki, tambe ta mira y ripara. Pesey, un di su metanan ta pa yuda e muhenan aki supera cualkier miedo of berguensa cu nan por tin.

“Tin biaha no tin hopi motivacion pasobra tin hopi perhuicio, tin hopi hende muhe cu ta sinti berguensa, nan no tin amor propio y pa mi esey no ta importa. Ken cu kier t’ey, e hende muhe cu kier yudansa, yega. Mi ta disponible pa yuda tur esnan cu kier yudansa pasobra nos tur a cuminsa un caminda stimando nos mes y pa nos por yega te ‘kinan, e ta rekeri esfuerso y como hende muhe un mester apoya otro y lo mi kier aporta grandemente na esey, si e ta den mi man pa haci esey,” el a finalisa.