Algun dia atras, comunidad a haya e noticia di e mantencion cu waterzuiveringsinstallatie na Bubali plas mester haya urgentemente pa no causa un calamidad pa Aruba. Director di Directie Natuur en Milieu (DNM), Gisbert Boekhoudt a señala cu hende mester ta consciente pa no basha desperdicionan di cushina, kimiconan of azeta den e sistema di drain na cas.

E planta di purificacion di awa su destinacion ta pa purifica e awa sushi, awa preto of shinishi, den un calidad hopi mas halto; pa reduci cu 90% e input cu ta supone di wordo saca afo. Esaki ta na riesgo aworaki y e tin su impacto riba e plas mes y tambe riba lama.

E luga cu por ta mas afecta den lama ta esun na unda tur hende ta landa na Palm Beach, sea turista of local. Tambe tin impacto riba coral rif. Boekhoudt a anuncia cu aña pasa nan a guia Caribbean Research and Management of Biodiversity (CARMABI) pa haci un investigacion riba e calidad di e coral rif di Aruba, desde nort te sur. A resulta cu e calidad di nan a disminui pa via di e cantidad di nutricion cu a bin den lama di parti di e purificacion, cu ta menos cu mester ta.

Di esaki, tambe el a menciona cu tin otro bacterianan, conoci como Algal blooms, cu ta haci cu awa ta cambia di colo y ta reduci su transparencia y si nan no lo wordo haci e riesgo ta bira mas grandi.

Boekhoudt a duna di conoce cu e mita di e awa cu tin den waterzuiveringsinstallatie su calidad ta abou. Di mesun manera a keda conoci cu e planta aki tin 48 aña y door di esaki e calidad a cambia; asina tambe loke e comunidad ta usa y come, pero tambe nos hendenan ta haci uso di remedi y otro kimiconan pa lava cushina of vloer, loke ta causa un impacto negativo riba e sistema.

E planta aki, el a afirma cu no a wordo destina pa procesa por ehempel, desperdicio di cushina of azeta. “Esaki ta pone e sistema upset”, su obhetivo ta pa trata awa di toilet, pero no pa e kimiconan cu hende ta usa den cas pa percura cu esey ta den bon condicion.

“Tin biaha cu hende ta tira azeta di auto den toilet. Manera esey ta cay aden pa dos siman henter sistema ta upset, no ta funciona mas”, Boekhoudt a menciona.

El a splica cu e microorganismo cu ta den e sistema, cu ta haci e proceso door di come e nutrientenan, nan ta muri of stop; e ora ey e awa ta bira mas sushi y e holo ta bira pio.

Tambe el a sigura cu loke nan a haci hunto cu DOW y AHATA den dos ocasion na 2013 y 2017, ta cu nan a acerca e hotelnan cu ta conecta cu Bubali Plas pa puntra nan kico nan ta descarga. E ora ey nan a duna e informacion pakico e planta ta wordo destina pa procesa cierto tipo di awa y ki sorto di awa of producto no por procesa.

Boekhoudt a trece dilanti cu tambe ta existi poolnan cu awa di lama. Esaki tambe ta causa dañonan den sistema y cada otro kimico cu no ta di ‘toilet’ ta stroba su funcionamento.

Boekhoudt a anuncia cu nan a acerca hotelnan mes pa nan tuma nan responsabilidad. Cada hotel por bin cu un sistema pa ‘catch’ azeta di cushina. Loke nan mester ta pa pone e azeta apart y contrata companianan y fundacionnan cu ta colecta esaki.

Esaki no ta un yamado solamente pa Gobierno cu tin un tarea den esaki, pero tambe e usuarionan y henter comunidad, cu tambe tin un tarea. El a informa cu conhuntamente cu AHATA nan tin un bista di kico e companianan hotelero ta descarga y kico nan tabata haci cu a bira menos.

Siman pasa, durante un conferencia di prensa a keda conoci cu waterzuiveringsinstallatie no por carga mas e desaroyo den e area y mester di un renobacion urgente, prome cu sucede un calamidad pa Aruba.

Di esaki, minister di Infrastructura, Desaroyo Teritorial y Medio Ambiente, Marisol Lopez-Tromp a anuncia cu aworaki ta den proceso pa reuni y traha conhunto cu otro instancianan cu por yuda pa yega na un posibel solucion. Pero tambe ta nifica cu no solamente Gobierno, sino esunnan cu ta den e area ey cu ta haci uso di e planta aki directo of indirectamente mester participa den e solucion.

Den transcurso di añanan cu gobierno tabata cera acuerdonan of ainda ta cera, entre otro cu hotelnan, e parti aki no ta hinca specificamente aden y por ta cu lo considera pa hinca esaki den acuerdo pa futuro.