Giovanni Trim, un ciudadano conoci y preocupa pa situacion di e pais, cu a cuminsa graba videonan informativo for di algun luna pasa, diabierna ultimo a anuncia cu el a tuma over partido UPP (Union Patriotico Progresista), cual awor a bira “Union y Prosperidad pa Pueblo”.

Den un presentacion hopi intimo cu a tuma luga diabierna ultimo cu famia y amigonan, Trim a trece dilanti cu despues cu gabinete Wever-Croes a entrega su retiro dia 9 di september, e partido cu originalmente su persona tabatin pa lansa no por a culmina su proceso pa por participa den eleccion aki pa dia 6 di december.

El a sigura cu despues cu el a traha su videonan treciendo su preocupacion dilanti pa loke ta sucediendo cu e parti politico y social, “Aruba a drenta den un etapa nobo,” algo cu nunca a experiencia, “unda politiconan a cuminsa duna placa bao mesa, regala cosnan cu ta di nos, mientras cu nos ta sigui bay atras.”

Pa esaki, el a dicidi di tuma over partido UPP, unda el a gradici Candelario (Booshi) Wever y Raymond Hernandez, kendenan a ofrece e partido aki mirando cu nan no ta bay participa mas den eleccion, segun loke Trim a sigura.

“Nos a bin awe determina pasobra nos kier pa Aruba sali for dje bomboshi, pa ultimo 30 aña Aruba ta solamente den bomboshi. Corupcion, soborno, hortamento di placa pa regala patrimonio di pueblo, problema cu Lotto. Unda cu bo wak Aruba tin problema y e hendenan, nos ciudadanonan na Aruba a fada,” el a bisa.

Segun su opinion, ciudadanonan a fada cu no kier ni tende mas noticia y cu unico cos cu e kier wak awor “ta pa nos sali for di bomboshi,” cual ta e slogan cu el a scoge pa su campaña y asina ey drenta den un Aruba “completamente nobo, yena cu oportunidad pa tur hende.”

UPP ta keda cu e mesun siglanan, pero cu otro significado. Segun el a menciona nan tin hopi proyecto “nos tin programa politico hopi avansa, pero den transcurso di siman aki boso lo wak nos programa cu ta bay ta hopi visual, videonan cu bosonan ta bay wak exactamente kico nos ta bay haci den e cuatro aña cu ta bin y con nos ta bay haci pa logra saca Aruba for di tur e situacion aki.”

Union y Prosperidad pa Pueblo segun Trim su perspectivanan ta cu “Aruba ta cansa di e politiconan, di e partidonan tradicional. P’esey mi ta kere cu e aña aki, dia 6 di december Aruba ta bay marca historia unda pa prome biaha e partidonan tradicional ta bay ta afo y e partidonan nobo ta esun cu ta bay briya y trece cambionan positivo pa Aruba, esey ta nos perspectivanan y esey tambe ta loke ta bay pasa.”

Pa loke ta trata otro candidatonan den su lista, Trim a bisa cu nan tin nan personanan scogi caba pero nan tur a palabra cu door cu nan tabatin hopi obstaculo pa loke ta trata caida di gobierno y nan mester a haci hopi cos pa haci e presentacion aki posibel, e siman aki nan lo enfoca riba e candidatonan cu lo subi riba e lista.

“Mi tin full un team na mi tras, nos tin un comite cu ta reuni un biaha pa siman, unda den reunion aki nos ta determina kico ta nos siguiente paso, na ken nos ta acerca, kico nos ta busca pa nos tin un bon partido di calidad,” el a comenta.

Pa loke ta trata e votadonan cu ainda no ta dicidi pa ken lo vota, Trim a señala cu “pa esun cu ainda ta duda, mi ta bisa bo un cos, ban sali for dje bomboshi. Aruba ta cansa di tur loke a sucede den ultimo 30 aña, ban percura pa nos pueblo ta un pueblo feliz unda nos tur tin e oportunidad pa biba e bida di nos soño y pa bo por biba e bida di bo soño, nos tin cu sali for di esaki.”

Segun Trim den eleccion aki e partido UPP ta bay marca un diferencia y Aruba ta bay ta full un otro pais “mescos cu a pasa na El Salvador, Spaña, Francia of Hulanda, partidonan nobo cu a bin de la nada lo trece cambionan positivo,” el a menciona.

Pa finalisa, el a cuestiona loke a sucede siman pasa cu SSA caminda a cuminsa un investigacion penal segun autoridadnan mes a señala pa loke ta trata iregularidad di maneho di fondonan publico unda deportistanan cu mester haya fondo ta para bao solo pa pidi ayudo y por bay representa Aruba den exterior.

“Esaki ta e tipo di gobernacion cu nos tin den e ultimo añanan, parlamento a bira un caos cu gañamento y tapamento, mal servicio den departamentonan di gobierno y aworaki nos a yega na un punto cu nos no sa mas pa ken nos tin cu vota. Partidonan AVP y MEP a hinca nos den e bomboshi,” el a finalisa.