Laga nos stop di pretende cu e problema di salud por wordo soluciona cu un sugar tax. E mensahe cu nos ta scucha ta cu un sugar tax ta forsa a comunidad scoge pa opcionnan mas saludabel y ta yuda reduci malesanan cronico.   

E ta un berdad cu tin un link directo entre consumo di sucu y malesanan cronico. Pero tambe ta un berdad cu e parti mas grandi di sociedad cu ta wordo afecta pa malesanan cronico ta esunnan di menos recurso y esunnan cu e entrada mas chikito den comunidad.  

Sugar tax a wordo introduci na diferente pais desde 2014. For di Mexico te na Inglatera. Segun e instituto Tecnologico di Mexico (ITAM) despues di 4 aña cu a introduci e sugar tax na Mexico ariba refresco,  e resultado ta cu e no a logra su obhetivo. Na prome instante e consumidor a reacciona ariba e subida di prijs y e consumo di refresco a baha durante un periodo cortico. Awe 4 aña despues e consumo a bolbe subi back y ta actualmente caminda e tawata prome cu a introduci e sugar tax na 2014. Ademas di esaki, durante e tempo cu e sugar tax a baha e consumo di refresco, toch e no tawata efectivo pa reduci obesidad of malesanan cronico .

Segun e estudio di COLMEX no tin niun evidencia cu un sugar tax ta efectivo pa trece cambio den e consumo di sucu di e consumidor. Specialmente no tin cambio den e consumo di esunnan cu entrada mas chikito cu ta e grupo di consumidor mas grandi. Sinembargo e posicion economico di e grupo aki si a wordo afecta di un manera devastador.

Medidanan ariba consumo semper ta pisa y dal esunnan mas pober den un comunidad mas duro. E famianan cu entrada minimo  ta entregando  mensualmente entre 25-30% di nan entrada  caba na caha di gobierno pagando pa tur belastingnan actual. Un famia cu un entrada modera ta entrega entre 10-15% di nan entrada na caha di gobierno. Si haci un comparacion, e parti di e salario cu e famia cu entrada minimo ta entrega na caha di gobierno tur luna ta 50 % mas cu e parti cu e famia cu di entrada modera ta entrega na caha di gobierno tur luna.

E sugar tax cu Aruba ta pensa di introduci lo tin probablemente mes un efecto cu e tawata tin nan Mexico y na otro parti di mundo. E sugar tax lo ta un manera di schuif e responsabilidad di e malesanan cronico ariba e victima, castiga esaki un poco mas y haci e peso grandi caba cu  esunnan mas vunerabel den comunidad  ta carga mas pisa ainda.

E conclusion no por ta otro cu un sugar tax lo ta solamente un set di medida pa trece mas placa den caha di gobierno. E no lo yuda cu problemanan di malesa cronico y tampoco e lo ta ta beneficio di salud general.

Sabiendo esaki, e lo ta inaceptabel pa acepta cu ta sigui cu e idea di un sugar tax.