E funcion di director di departamento di Guarda Nos Costa (GNC) ta sigui keda un reto pa Gobierno di Aruba debi cu candidatonan pa e funcion aki mester ta integro y no mester forma un peliger pa siguridad nacional di Aruba.

Dia 19 di februari parlamentario di partido MAS, Marisol Lopez-Tromp, a publica riba su rednan social preguntanan dirigi tanto na minister di Labor, Energia y Integracion, Glenbert Croes y minister di Husticia y Asuntonan Social, Rocco Tjon a base di un articulo cu a ser publica den otro medio local e mesun dia ey.

Segun Lopez-Tromp a trece dilanti “pa ley tur director of hefe di Departamento cu tin un ‘vertrouwensfunctie’, mester pasa den un veiligheidsonderzoek pa por eherce nan funcion. Sinembargo e realidad ta cu minister Glenbert Croes diariamente ta firma pa loco sin importa screening ni background, ta cuestionando con minister Rocco Tjon ta nombra cu of sin veiligheidsonderzoek actual. Tin un minister presidente cu ta permiti tur cos of ta wak otro banda,” el a sigura.

Tocante e preguntanan ta lo siguiente:

  • Cuanto ambtenaar ta eherce nan trabou como director of hoofd van dienst den e Ministerio di Husticia y Ministerio di Asuntonan Social, segun e bijlage di articulo 2 lid 1 di e landsbesluit, houdende algemene maatregelen, van 12 mei 2006 ter uitvoering van de artikelen 15 en 16, derde lid, van de Landsverordening Veiligheidsdienst Aruba (AB 2002 no. 115) (Landsbesluit aanwijzing vertrouwensfuncties en veiligheidsonderzoeken), cu nan veiligheidsonderzoek a sali negativo (cu bezwaar)?

Contesta minister Tjon: Ningun, den e sentido cu for di momento cu minister Tjon a ser notifica cu Sr. Winklaar su Verklaring van geen Bezwaar (VGB) a ser nenga, e formalisacion di su nombramento a stop. Y na e momento ey a hiba un combersacion cu su persona conhunto cu Departamento di Recurso Humano pa inicia e proceso di busca un “passende functie” den e aparato gubernamental pe. Na mes momento mi mester bisa cu Sr. Winklaar tin e derecho di apela e decision.

  • Minister Tjon tin cu percura segun articulo 9 di e landsbesluit, houdende algemene maatregelen, van 12 mei 2006 ter uitvoering van de artikelen 15 en 16, derde lid van de Landsverordening Veiligheidsdienst Aruba (AB 2002 no. 115) Landsbesluit aanwijzing vertrouwensfuncties en veiligheidsonderzoeken) pa su directornan cada 3 aña tin un veiligheidsonderzoek cu ta valido, of si acaso tin echo of circunstancia cu ta rekeri esaki, mester haci un veiligheidsonderzoek di nobo. Tin director cu nan veiligheidsonderzoek a caduca y tin director cu mester a haci nan veiligheidsonderzoek di nobo?

Contesta minister Tjon: Landsverordening veiligheidsdienst a ser adapta na 2021. E landsbesluit aanwijzing vertrouwensfuncties en veiligheidsonderzoeken no a ser adapta ainda conforme e cambionan menciona den e landsverordening. Artikel 17 di e landsverordening (nobo) ta bisa cu minister por haci un veiligheidsonderzoek cada cinco aña of si tin motibo (feiten en omstandigheden) mas prome. Esey kiermen cu un VGB ta keda valido y no ta caduca.

  • Segun e articulo di 19 februari 2024, pagina 2 di corant AweMainta tin e siguiente pregunta: e director di Guarda Nos Costa, cual tabata director di KIA, tin of no tin un veiligheidsonderzoek haci y kico ta e resultado di esaki?

Contesta minister Tjon: Minister a referi su contesta riba pregunta 1.

  • Cuanto director den e Ministerio di Husticia y Asuntonan Social cu tin vertrouwensfuncties conforme e bijiage di landsbesluit aanwijzing vertrouwensfuncties en veiligheidsonderzoeken a pasa e veiligheidsonderzoeken aki y a keda acepta (geen bezwaar)?

Contesta minister Tjon: Tur a keda acepta cu excepcion di Sr. Winklaar y e persona anterior cu tabata encarga cu departamento di GNC.

  • Cuanto director den e Ministerio di Husticia y Asuntonan Social conforme e bijlage di landsbesluit aanwijzing vertrouwensfuncties en veiligheidsonderzoeken no a pasa e veiligheidsonderzoeken aki (cu bezwaar) y ainda t’ey den nan funcion?

Contesta minister Tjon: Ningun.

  • Cuanto director den e Ministerio di Husticia y Asuntonan Social conforme e landsbesluit aanwijzing vertrouwensfuncties en veiligheidsonderzoeken no a pasa nan veiligheidsonderzoek ainda?

Contesta minister Tjon: Tin un persona ta en espera di e resultado di su veiligheidsonderzoek.

Segun Veiligheidsdienst Aruba (VDA) funcion di confiansa ta un funcion na Aruba den cual e forma di cumplimento por representa un peliger of un riesgo pa existencia continuo di orden huridico democratico, integridad di administracion publico of siguridad y otro interesnan vital di Aruba manera Lbham ta indica den su articulo 2.3.

Un veiligheidonderzoek di Siguridad Nacional di Aruba ta tuma na cuenta inteligencia hudicial, proces verbaal di polis, participacion of apoyo den actividadnan peligroso di Estado, apoyo na organisacionnan peligroso pa Estado, comportacion y circunstancianan personal den un periodo di e ultimo 10 aña di bida di e persona en cuestion.

E proposito di e investigacion aki ta pa determina si e persona por cumpli fielmente cu su obligacionnan den e funcion como ambtenaar cu un posicion di confiansa den gobierno den tur circunstancianan, ademas tambe ta wordo haci pruebanan medico y psicologico.

Di e forma aki ta evita cu por cuminsa cu un investigacion di siguridad mientras cu te ainda no tin garantia cu e persona en cuestion ta cumpli cu tur e rekisitonan di su funcion.

Lamentablemente, departamento di Guarda Nos Costa ta bin hayando golpi tras golpi den ultimo 3 aña mirando cu e director interino anterior Richard Kramers su VGB tambe a ser nenga door di VDA dia 13 di juli 2022.

Despues di e investigacion di VDA a conclui cu Kramers ta nenga su nombramento formal pa e funcion di confiansa di director di GNC, den e investigacion aki a sali na cla cu nan a reconoce un patronchi di e actitud intimidante y comportacion di Kramers pa loke nan ta conclui cu no ta existi garantia suficiente cu e lo cumpli fielmente cu e debernan deriva den e posicion di confiansa den cualkier circunstancia.