Gino Tromp y Ferdinand Ponson a ricibi diploma di “Vak-Officier”

E prome curso di “Vak-Officier van Dienst” den Caribe Hulandes, e prome di su tipo, a tuma luga na Boneiro y a conta cu participacion di miembronan di Cuerponan di Bombero di tur e islanan. Dos miembro di Cuerpo di Bombero y Rescate Aruba a participa, esta Gino Tromp y Ferdinand Ponson. Ambos a gradua y a ricibi nan diploma recientemente durante di un evento special na e kazerne nobo di Boneiro den presencia di Comandante di Brandweer di Aruba, Ing. Edward de Cuba.

E diploma ta otorga pa IFV, Instituut Fysieke Veiligheid, di Hulanda y ta reconoci den reino Hulandes. Tabata Jaap Molenaar,  decano y representante di IFV y Jair Tromp, Comandante di Cuerpo di Bombero di Hulandes Caribense, kendenan a presenta e diploma na e graduadonan. Jair Tromp ta di Aruba, cu a studia na Hulanda y anteriormente a forma parti tambe di Cuerpo di Bombero di Aruba.

E estudio, cu a cuminsa na 2014 y a caba na 2015 a conta cu 11 participante, un di Corsou, dos di Sint Maarten, dos di Aruba y seis di islanan BES. E examen final a tuma luga dia 24 di juni 2015.

E islanan di Caribe Hulandes tabatin mester di officiernan pa maneha incidentenan di escala grandi y ta costa menos y tabata mas facil pa ofrece e curso aki den Caribe mes pa esunnan cu ta biba y traha den e region aki.

E curso a tuma luga entre e islanan y a conta cu docentenan local y di Hulanda. Na Aruba Comandante De Cuba, kende tin cualificacionnan amplio como docente y examinado principal, a fungi tambe como docente y guiado na pia di trabou di e dos cursistanan. El a supervisa nan proyectonan y guia e candidatonan.

Cuerpo di Bombero y Rescate Aruba ta satisfecho pa anuncia cu nan ta conta cu dos officier nobo cu ta parti di nan mesun team y ta gradici nan pa nan interes y esfuersonan pa hiba e institucion padilanti. E comandante di Cuerpo di Bombero di Aruba ta gradici famia, amigo y coleganan di e cursistanan pa a brinda nan espacio, pasenshi y sosten durante di nan estudio, cual a rekeri cooperacion y sacrificio necesario.

Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu 160 empleado, di cual 112 ta traha activamente cu combatimento di candela. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas o menos 1600 aviso, cu ta varia entre combatimento di candela, rescate, yudansa special y trabounan na aeropuerto.