Gino Goeloe: Nos grandinan ta birando mas grandi

Durante presentacion di rapport anual di Wit Gele Kruis na prensa recientemente, su director, Gino Goeloe, a expresa cu por mira cu den e ultimo aña,
nos grandinan ta birando mas grandi y debi na esey, nos por mira hopi mas malesa, manera Alzheimer, cu ta subiendo dia pa dia, como tambe pashentnan cu ta haya atake celebral y esnan cu ta haya e malesa di Parkinson. Loke tambe por a mira den e rapport anual ta pashentnan cu cancer.
Esey ta algo cu Wit Gele Kruis pa varios aña a bin ta duna splicacion y programanan educacional na television pa e malesanan cronico na unda cu a bin cu programanan audiovisual, cu ta programanan cu a wordo sosteni pa Aruba Way Foundation pa asina sigui educa nos comunidad.

Cos no ta bira mas barata
Aunke nos por bisa cu pa drenta den di tercer edad ta algo bunita, ta
bin door di tecnologia, door di remedinan cu awendia, cu no tabata tin
50 aña pasa, awor si tin. Operacionnan cu no por a tuma luga, awo si
tin e tecnologia aki, pero e ta costa placa. Ora mas hende bira mas
di edad grandi, ta bay sinti esey riba AZV. AZV por pronostica cu nan no
lo bay bira mas barata, pasobra cada un grandi cu tin un complicacion
cu diabetes por ehempel, si no cuida curpa por haya problema cu
wowonan, por haya problema cu nervionan, por haya problema cu niernan.

Salud di nos pueblo
Loke ta para den e rapport anual cu na 2006 a haci, den e caso aki
gobierno, PAHO y WHO y Despa, un investigacion, den e parti di con
saludabel nos comunidad ta. E tempo ey a sali cu nos hendenan ta biba
un bida no saludabel y 77% di nos comunidad tabata obeso y esey ta
trece malesanan cronico cun’e. A yega momento un biaha mas pa midi nos
hendenan y no nos adultonan so, pero pa e muchanan tambe cu ta bay
scol awendia, cu tambe mester midi eseynan, pasobra nan ta futuro di
nos pais Aruba y bin cu programanan pa gara e problema aki tambe,
segun Goeloe.

Ban cuida curpa
Pa nos tin nos pueblo saludabel, e tin cu biba y come saludabel. Gino
Goeloe di Wit Gele Kruis a pidi durante e conferencia di prensa, pa
nos comunidad cuida curpa.

Goeloe ta splica: “Corda den e caso aki come saludabel. Corda baha man
riba e sucu, corda baha man na salo y e vet y haci movecion mey ora pa
dia y come mas berdura posibel, laga e zetmeel, e aros, cu e banana na
banda y bay come mas fruta cu ta posibel. Y mester bisa cu sa cu e
sucu ta bin hopi di bebe soft. Ban baha man na e soft ey. Ban bebe
juice natural of ban bebe awa. Bebe ocho glas di awa pa dia. Awa ta e
likido di mas saludabel cu tin riba e mercado actualmente. Laga nos
mes ban tene nos curpa saludabel pasobra den e caso aki tin cu bisa ta
un curpa nos tin, laga nos cuid’e,” Goeloe a expresa.