ORANJESTAD – Ayera den oranan di atardi, durante un rueda di prensa di Stichting Eliezer, Gino Frans, director di Stichting Rehab Center di Paradera, hunto cu Marlon Istacia, secretario, a splica di loke nan ta organisa pa e siman aki, dirigi pa tur persona cu lo kier asisti pa scucha e testimonio cu Gino Frans y Marlon Istacia lo duna di conoce, despues cu nan a sali di e mundo di alcohol y droga.
Nan a bisa cu Stichting Eliezer lo organisa dos anochi di testimonio dia 30 y 31 di januari proxmo, dilanti di Sport Hall Betico Croes na Santa Cruz, di 7or pa 10or di anochi, unda Frans cu Istacia lo kier comparti cu tur hende con nan bida a cambia drasticamente desde cu nan tabata adicto pa alcohol y droga.
Frans a bisa cu el a caba di cumpli 22 aña sin uza alcohol y droga. El a comenta mirando cuanto problema tin na Aruba y rond di mundo tambe pa consecuencia di e substancianan y bebida ey, el a bisa cu hopi adictonan ta lanta dia pa dia.
Stichting Eliezer ta un fundacion cu a ser lanta pa Frans na Hulanda, den temponan cu e tabata adicto. Awo e ta traha cu adicto, y pa via di esey ta invita pueblo di Aruba pa asisti pa e dos anochinan y comparti su experiencianan, y expresa cu tur e adictonan tin speransa y chens pa sali di e caminda ey.
Frans a expresa cu den famia semper tin un persona cu ta sufri. E adicto ta uza alcohol y droga, pero tin den cuenta cu rond dje tin hopi cu ta sufri tambe. “Awendia den famia tin un adicto, antes tabata un tabu, pero awo tur famia tin un adicto”.
Marlon Istacia, secretario di e fundacion, a comenta cu e tambe tabata adicto pa droga y el a enfatisa cu su prome droga tabata ‘marihuana’, e cual el a splica cu den tempo aki na Aruba ta existi hende cu kier legalisa e ‘uzo medicinal, pero no sa kico tin tras dje’, manera Stacia a bisa.
E alcohol cu ta un principal problema di Aruba, ta un droga legal. Segun Frans a expresa cu ‘hendenan mester cuminsa lanta bo yiunan y siña nan desde chikito pa no mishi cu alcohol’.
