Ginelly Quandt tin un trayectoria extenso den mundo di trabou boluntario y den e ultimo añanan e ta haci trabou boluntario pa Stichting Rancho den diferente area. Den un entrevista cu Bon Dia Aruba e ta conta con su trayectoria den e mundo di trabou boluntario a cuminsa y kico por haci pa mehora e aspecto di trabou boluntario na Aruba.

Ginelly ta conta cu su trayectoria como boluntario a cuminsa na Hulanda den añanan 2013/2014 unda cu e tabata studiante e momento ey y pa por a explora ciudadnan grandi of drenta den e comunidadnan, trabou boluntario tabata e manera pa por a conecta cu hende. “Esey tabata mi meta e tempo ey y tambe pa por haya sa con cierto barionan ta funciona cu tur esey,” el a indica.

El a splica cu e tabata haci un estudio di musica e momento ey y e tabata buscando un luga di stage. El a haya informacion tocante un luga di stage hopi creativo na Hulanda y el a tuma e oportunidad pa haci stage no paga, cu tambe ta un manera di haci trabou boluntario.

Ginelly a sigui splica cu via e plataforma di Hulanda ‘vrijwilligersvacature’, cu ta un plataforma grandi na Hulanda pa trabou boluntario, el a ser conoci cu mas organisacion na Amsterdam y asina el a haci trabou boluntario den festivalnan, den centronan di bario, den cosnan di arte, teatro, entre otro. “Nan ta haci un yamada pa ken cu kier bira boluntario, si bo ta inscribi caba bo ta haya un e-mail, bo ta registra y asina el a cuminsa pa mi,” el a resalta.

Pe e tabata mas cu solamente tin e oportunidad di conoce otro tipo di hende, conoce otro tipo di bario y luganan cu tal bes e no tabata sa di dje, pe e tabata tambe e oportunidad pa duna algo back na comunidad na su manera. “Tin biaha djis door di papia cu hende bo ta yudando e comunidad,” el a enfatisa.

Ginelly ta conta cu el a bin Aruba no precisamente pa haci trabou boluntario, pero el a sigui cu esey como un habilidad cu e tin. Ora el a yega Aruba el a ser conoci cu Stichting Rancho hopi lihe y el a dicidi di yuda como boluntario.

Su prome proyecto como boluntario na Stichting Rancho tabata yama Tempo pa Click cu tabata un proyecto di fotografia na aña 2015. A traves di e proyecto aki el a trece hobennan den bario pa participa den e proyecto ey, pa asisti na cualkier exposicion y haci diferente otro actividad.

El a sigui conta cu durante su trayectoria como boluntario el a yega di yuda varios organisacion, pero aworaki den mayoria e ta yuda Stichting Racho pasobra e tin hopi cos.

“Locual cu mi ta haya great di Stichting Rancho ta cu mi a cuminsa como boluntario y mi a sigui como boluntario pa tres aña, despues como Stichting nan a bisa mi pakico mi no ta haci uso di e conocemento cu mi tin pa skirbi proyectonan pa asina por haya fondo tambe pa paga mi como trahado. Mi a sigui como trahado na Stichting Rancho te ora temporada di COVID a yega y fondonan a caba. Despues mi a cuminsa un estudio nobo, cua mi ta bezig cune ainda, pero toch mi ta haci trabounan boluntario. Mi ta un artista dus mi ta haci difernete cosnan creativo bou di Stichting Rancho,” el a indica.

Otro organisacionnan cu Ginelly a yega di yuda ta entre otro Centro di Bario Playa Pabou, organisacionnan cu ta puntra pa yuda nan cu sacamento di potret y Aruba Doet cu tambe el a participa na dje hopi biaha. “Tin hopi tipo di organisacion of iniciativa cu mi a participa den dje,” el a agrega.

Na Aruba fundacionnan regularmente ta expresa e dificultad cu nan ta encontra pa haya personanan pa traha como boluntario. Tocante esaki Ginelly a splica cu for di su perspectiva e organisacion mester miho branding y promociona e trabou boluntario den un manera cu ta interesante pa hobennan tambe.

El a indica cu tin organisacionnan cu tin asina hopi cos pa siña como boluntario, pero nan no tin e branding of e promocion pa atrae hendenan pa haci trabou boluntario.

“Si mi compar’e cu Hulanda, e sector boluntario ta hopi grandi y tin hopi fondo, tin hopi mas branding, locual ta haci cu e hendenan ta mas dispuesto pa haci trabou boluntario. Mi sa bo no por aplica loke tin na Hulanda na Aruba pasobra Hulanda tin otro sociedad otro sistemanan, pero na Aruba nos tin cu defini kico nos kiermen cu trabou boluntario exactamente,” el a remarca.

Banda di esey, el a agrega e fundacionnan mester wak con nan por incentiva e boluntario pa haci trabou boluntario, ki tipo di apoyo por brind’e, cu no ta solamente un cuminda of cierto cosnan basico, pa e sigui haci e trabou.

El a splica cu esaki por inclui entre otro oportunidadnan pa e boluntario siña cosnan nobo of dun’e cierto cosnan pa e por keda traha na e organisacion. Esaki ta un aspecto cu for di punto di bista algun organisacion na Aruba falta.

“Hopi ta haci manera cu boluntarionan t’ey pa traha y ya, sin tin un structura of guia of sikiera pa puntra kico e boluntario kier siña, kico nan kier sa. Esey mi ta haya falta di dje den e mundo di trabou boluntario na Aruba,” el a resalta.

Actualmente Ginelly ta explorando e tema ey pa su tesis y den su investigacion el a haya sa cu na e islanan pacifico e trabou boluntario ta parti di e bida di e ciudadanonan, algo cu ta no solamente bunita pero importante.

“Mi ta kere cu na Aruba nos tin cu defini kico nos como sociedad ta wak como trabou boluntario y cuminsa traha riba esey y wak con por incorpora cierto elemento cu ta yuda e boluntario pa e siña y no djis bin traha y bay pasobra esey no ta e meta su tras,” el a enfatisa.

Por ultimo Ginelly ta extende invitacion na cualkier fundacion of organisacion cu lo kier yudele desaroya su tesis pa tuma contacto cune via e-mail: 183180@student.ua.aw