Lucasfilm ta bisa cu Gina Carano no ta parti di elenco di ‘The Mandalorian’ mas despues cu hopi persona online a exigi su retiro, pa motibo di un post riba rednan social cu a iguala e experiencia di Hudiunan durante Holocaust na e clima politico na Merca.
Un vocero di e compania di produccion a bisa den un declaracion diaranson cu Carano no ta actualmente emplea pa Lucasfilm sin ‘plan pa e ta den futuro’. “Sinembargo, su postnan riba rednan social denigrando hende basa riba nan identidadnan cultural y religioso ta abominable y inaceptable”, e declaracion ta bisa.
Carano a ricibi critica pisa despues cu el a post cu ‘Hudiunan a ser bati riba caya, no door di soldadnan Nazi sino nan propio bisiñanan… hasta door di mucha’.
E actor a continua bisando: “Pasobra historia ta edita, mayoria di hende awendia no ta realisa cu pa yega na e punto unda soldadnan Nazi por a facilmente colecta miles di Hudiu, gobierno prome a haci nan propio barionan odia nan simplemente pa ta Hudiu. Con esey ta diferente cu odia un persona pa nan opinion politico?”
Carano, kende a interpreta e personahe recurente Cara Dune den e serie di ‘Star Wars’, a elimina e post, pero esaki a ser comparti ampliamente dunando impulso na e hashtag #FireGinaCarano bira un tendencia riba Twitter. Su persona a aparece den varios episodio di e segundo temporada di ‘The Mandalorian’, un serie tocante un bounty hunter y su aventura pa uni un usuario hoben di e Forsa cu un cabayero Jedi.
Carano, un ex-atleta di MMA kende su personahe Dune a usa un mescla di arma pisa y su mokete pa vence su oponentenan, a ricibi critica pa postnan riba rednan social cu a burla di hendenan bistiendo tapaboca durante e pandemia y a alega fraude den eleccion presidencial 2020. Tambe el a burla di e uso di pronombrenan di genero, listando ‘beep/bop/boop’ den su bio riba rednan social.
