Den un entrevista recien cu lider di partido HTC, Gilbert Webb, el a conta Bon Dia Aruba tocante puntonan importante cu e partido ta enfoca riba dje den nan plan di partido y con nan ta plania pa logra esaki.

Na aña 2021 partido HTC a drenta e arena politico cu un idea cu a sorprende hopi, e idea pa bin cu parke di atraccion na Aruba. E aña aki e partido ta sostene e idea aki ainda y ta prome punto cu nan a implementa den a nan plan di partido. Bon Dia Aruba a puntra Webb con e partido a yega na e idea aki y con nan ta bay logra haci esaki realidad teniendo na cuenta tur e logistica pa esaki.

El splica cu e pilar economico di Aruba, turismo ta representa 85% di e GDP, y refineria tabata representa 12%, pero como cu a perde e entrada aki, el a resalta cu mester bin cu algo nobo y eynan ta caminda partido HTC ta kere cu parke di atraccion ta ideal.

El a sigui splica cu e motibo pakico nan a scoge un parke di atraccion ta pasobra mundialmente esaki ta duna bon resultado. El a menciona como ehempel Dubai y Singapur na unda un parke di atraccion a haci un diferencia y a yuda e pais.

Webb a indica cu HTC a cuminsa haci estudio riba esaki y a percura prome pa wak unda ta bon pa trece esaki y a pensa pa trece esaki na San Nicolas, na Colony pa ta exacto.

El a resalta cu e parke di atraccion ta bay yuda cu e entrada di pais Aruba unda cu por aloca fondonan necesario na diferente ministerio y percura cu Aruba ta bay den u n miho caminda.

El a remarca cu e parke di atraccion lo yuda tambe den crea cuponan di trabou. El a splica cu ta bay tin mester hende pa traha como ingeniero, e operadornan, trahadonan cu lo bende tickets, tienda- y kioskonan.

E parke lo contene un aspecto di informacion y educacion di cultura di Aruba. Webb a sigui splica cu na unda rollercoasternan lo bin,den e caminda pa yega na esakinan ta bay tin e parti educativo pa siña tocante e cultura di Aruba, por ehempel tocante e shoco, yuwana y mas.

El a resalta cu esaki bira realidad, e lo ta e prome den Central America y locual ta nifica cu un persona di Corsou, Boneiro of Sint Maarten, of paisnan den region, en bes di bay Merca nan lo bin Aruba disfruta.

Webb a enfatisa cu e diferencia di e idea di parke di atraccion na 2021 compara cu aworaki ta cu na 2021 nan a djis papia di e idea, pero e biaha aki nan ta miho prepara y tin material pa demostra con pa haci’e realidad.

Pa HTC un parke di atraccion ta un stap pa diversificacion di economia, ya cu e ta enfoca riba local tambe, y diferente area, no ta solamente pa turismo, pasobra si e ta solamente pa turismo e no ta algo cu e localnan lo ta disfrutando di dje. “Nos kier percura pa e localnan tambe tin e oportunidad pa forma parti di e parke di atraccion,” el a agrega.

Den su plan di partido HTC, manera otro partidonan, ta menciona cu nan tin como meta aumenta pensioen y elimina BBO. Bon Dia Aruba a puntra Webb con HTC tin plania pa logra e metanan aki.

El a splica cu mester cuminsa cu e reformanan fiscal. El a indica cu den e Landspakket tin e parti unda Hulanda ta exigi pa Aruba bay den direccion BTW, cual el a sigura ta algo cu no por ser ignora.

El a splica loke nan kier logra ta trece un mehoracion y e mehoracion aki, Webb a resalta, ta cuminsa na percura pa elimina e BBO. El menciona cu gobierno a bisa den pasado ora introduci BAVP cu esaki lo ta temporal, pero diripiente el a keda, y aworaki si laga e BBO y pone e BTW riba dje e ta bay keda permanente.

El a remarca cu HTC lo percura pa kita completamente e BBO y otro impuestonan “cu tin e pueblo manca” y introduci BTW manera Hulanda ta desea. El a menciona cu tin un estudio tras di esaki cu ta haci cu Hulanda ta kere firmemente den esaki. “Nos tambe ta kere e ta posibel, pero mester tene cuenta cu mester elimina cierto impuestonan pa no manca e pueblo,” el a agrega.

Apart di esey Webb a indica, HTC tin poni den plan di partido introduccion leynan estricto pa control di prijs. El a enfatisa cu no tin sentido di haci e cambio aki y e comerciantenan ta keda abusa y subi prijsnan.

El a subraya cu HTC kier percura pa tin trabou den conhunto y percura cu ta cumpli cu reformanan fiscal na Aruba. “Si no tin un manera pa bin cu un pilar economico nobo,bo ta bay sigui manca e pueblo y esey nos no kier,” el a destaca.

Pa loke ta e punto di aumento di pensioen, Webb a splica cu HTC a remarca cu esaki ta hopi importante pasobra aworaki cu nan ta den campaña y ta bishita casnan den bario nan ta mira e preocupacion di e personanan, con nan ta pasando den e situacion dificil na unda mester paga remedi y belasting y e placa cu nan ta ricibi no ta yega.

El a indica cu e punto principal pa nan ta cu si tin surplus manera gobierno demisionario ta proyecta, cual ta sin un otro pilar economico, si logra establece otro pilar economico, e ta bira un posibilidad pa aumenta pensioen. “Tur cos ta bay stap pa stap. Nos lo kier haci’e fase pa fase pa por yega na e parti di aumenta pensioen, pero tambe bahando edad di pensioen y pa haci esaki mester percura pa trece entrada prome,” el a indica.

Bon Dia Aruba puntra Webb si nan haya apoyo di pueblo y logra suficiente voto pa drenta Parlamento di Auba, kico lo ta e puntonan di prioridad pa partido HTC. El splica cu e plan ta pa cuminsa di biaha cu e parti di haci mas estricto e leynan cu tin di haber cu castigo di abuso sexual di mucha.

El a sigui splica cu nan kier enfoca tambe riba e personanan cu tin autismo pasobra, segun Webb a indica, na Aruba no ta enfoca ampliamento riba e personanan aki. Otro aspecto cu nan lo kier trece cambio den dje ta sector di enseñansa, nan lo percura pa drecha e leynan anticua den enseñansa, y tambe e partido kier introduci control estricto di prijsnan na supermercadonan.

Por ultimo, Webb a expresa cu e eleccion aki ta e momento pa pueblo di Aruba tuma e accion necesario dia 6 di december. “Hopi biaha nos ta wak como cu e ta djis un voto, nos pensamento ta cu e no ta bay asina. E ta bo prohimonan, esnan eyfo cu ta pasa den momento dificil. Nos tin cu pensa en general, saca un man y bisa bo sa ban yuda nos prohimonan pa progresa, ban enfoca riba otro. Bo voto no ta yuda abo so, e ta yuda henter bo pais,” el a enfatisa.