Ayera den oranan di mainta, mientras partido Hubentud Treciendo Cambio ‘HTC’ tabata haci campaña den bario di Noord, specificamente na caya Semeleerstraat, e lider di e partido Gilbert Webb hunto cu otro dos candidato a bira victima di agresion di parti di tres persona hoben cu tabata den auto color oro, segun Webb a sigura.

Bon dia Aruba a tuma contacto cu Webb pa asina e por splica con e incidente a tuma luga. El a conta cu den dianan aki nan a cuminsa haci campaña pa e partido di e cual e ta lider y tabata acompaña di otro candidatonan. El a expresa cu door di campaña, tin hende cu ta comunica cune pa haci bishita denna nan cas y scucha nan proyectonan y programa di gobierno.

“Durante cu nos a keda cla cu e bishita, nos a dal un cana den bario y na e momento ey un auto color oro di glas scur cu tres hende den dje, mi ta supone cu ta muchanan entre 18 of 19 aña, nan a bin den direccion di nos y nan a bin masha duro mes riba nos, esey ta intento di asesinato”, Webb a señala.

Na e momento ey, Webb a informa cu nan a dicidi di core na banda y e personanan ey a para e auto di biaha, na unda un di nan a bin cuminda Webb cu boots, manera el a sigura.

“Como politico bo por duna boots y cuminda. E ora ey el a bira, el a saca su man y dal den mi cabes masha duro y core bay”, el a afirma.

Ya cu e incidente a bay di e forma aki, nan a dicidi di yama polis. Y na momento cu autoridadnan a presenta na e luga, nan a sali pa rondia e auto. “Mi tabatin asina hopi dolor cu mi a bay dokter na Eerstehulp y di eynan nan a dicidi di manda mi na dokter di cas”, el a expresa.

Di esaki, el a manifesta cu el a haya un carta di dokter na unda ta bisa cu e tin lichte hersenschudding. E dolor ta constante y no ta stop door cu e persona a dal cu presion, “el a dal mi masha duro”, Webb a declara.

Asina mes, el a conta cu el a bay recherche na unda el a entrega e carta di dokter tambe. Testigonan cu tabata cune, como e otro dos candidato Michelangelo Celestijn y Latoya Briggs, tambe a duna nan declaracion.

Webb a duna di conoce cu nan ta espera cu e caso lo tuma luga pa autoridadnan por gara e persona. Segun el afirma, na e momento cu nan tabata na Semeleerstraat, polis a bisa nan cu e informacion di auto no ta klop cu e adres, algo cu el a afirma cu por ta cu nan a kita un plachi number y pone riba e auto aki. “Pero esey ta e nummerplaat cu nos a wak y nos ta espera cu nan por tuma e caso na serio.”

Ademas, el a menciona cu nan ta e unico partido cu constantemente tin hende cu ta yama pa insulta nan, pa manda palabranan di menasa. Di esaki el a expresa cu un otro biaha un otro persona a bin y agredie na su schouder, “y mas cosnan cu nos no ta bay tolera. Nos ta hende grandi y nos mester por respeta”, Webb a bisa.

Esaki no ta e prome proces verbaal cu nan tin. Manera Webb a sigura, tin otronan mas cu a tuma luga pa lo cual nan tin expectativa cu eseynan tambe lo wordo trata mesun cos cu esaki y por tuma accion.

Di otro banda, a puntra cu door di agresionnan cu Webb a sufri contra su persona despues cu el a dicidi di bay den politica y participa den eleccionnan cu su partido, kico lo sucede despues di ayera, si nan lo sigui cu e campaña. Pa esaki el a contesta cu nan no mester tuma esaki como algo pa nan haya miedo, “di berdad nos mester wordo protegi, ami ta mira asina”.

Igualmente, el a expresa cu e ta papia cu su candidatonan pa via cu esaki ta unico partido cu cierto hendenan ta tumando nan participacion den eleccionnan como un wega, “y cu nan por haci kico nan kier. Esey ta algo na unda nos ta haya cu nos mester di un proteccion total”, el a señala.

Tambe el a bisa cu nan mester sigui campaña y no keda keto, pa motibo cu nan ta un partido. “Nos tin tur nos derecho fundamental y ora cu nos ta wordo maltrata di e manera aki, ta algo cu nos no ta di acuerdo cune. E lucha tin cu sigui”, el a declara.

Pa finalisa, Webb a comenta cu tin personanan cu ta nan opositor, por ehemplo siguidonan di otro partidonan, pero cu “tur hende merece respet. Un solo meta ta pa nos bay den un solucion pa e pais aki y asina haya un cambio di berdad, haci un progreso pa Aruba.”

Partido HTC a wordo crea aña pasa pa un grupo di hobennan cu ta priminti comunidad pa caba cu pobresa y corupcion. Recientemente nan a duna di conoce nan programa di cambio, na unda nan ta resalta cu como ciudadano, pa hopi aña ta pasando den mesun ola bruto cu nunca no tin trankilidad y felicidad na cada hogar y den bida diario.

Nan ta menciona varios pilar economico pa asina crea mas cupo di trabou, cambiando sistema di cobra impuesto pa kita extra peso for di esunnan cu ta pasando den momentonan dificil, “duna alivio berdadero na pueblo, gobierno lo ricibi mas entrada, sin perdida cu lo no afecta pueblo”.