Sr. Van Veen tabatin un “no kill shelter”. Hopi hende ta wak e cachonan y ta kere cu ta el a maltrata nan. Pa aclaria tur informacion publica anterior di estado mental di Sr. Van Veen, el a enfatisa cu e no tin ningun problema mental a traha 8 aña den gobierno y te cu 2011 tabata eherce su profesion di IT, te cu el a dedica su mes na cacho na “Happy Tails” cu tur cos tabata bayendo bon
Sr. Van Veen a splica cu locual cu tin na Wayaca ta un “kill bin”. Esey ta ora cu bo no ta gusta un bestia of bo no kier un bestia, ta djis hibe eynan anto 9 di 10, chens ta cu e ta djis haya un hangua y nan ta mata nan. “Happy Tails” ta un no “kill shelter”. “E manera cu e cachonan den mi cura a wordo mata ta inhumano. Ami ta traha cu Kiki di Fundacion Cas pa Animal y e ta den e proceso pa traha un no “kill shelter”. Ora cu esey keda cla, tur e cachonan di Kiki cu tabata cerca mi, lo a bay eynan.
A puntra Sr. van Veen si prome cu e fecha 10 di mei, Asuntonan Social of otro instancianan manera Polis a yega di papia cun’e pa e situacion cu e y su mama ta biba aden. El a bisa cu no, dos aña pasa tabatin contacto cu polis dilanti porta di cas y a mustra nan cu tin papel di veterinario, recibo di Superfood, Awa etc. y cu e cachonan ta bon.
No sa motibo specifico cu a drenta su propiedad
Locual cu a pasa 10 di mei ainda no ta cla pa Sr. Van Veen cu ta bisa di no sa kico ta e rason specifico cu nan a haci locual cu nan a haci. Pasobra e ta biba hopi patras y no hopi hende ta pasa eynan. E ta bisa di a papia cu bisiña cerca di dje cu no tin keho di dje. (Anterior, Bon Dia Aruba tambe a papia cu un bisiña cu a bisa cu no tabatin molester).
E persona cu a ataca Sr. van Veen den su cas ta Eldrick Cabral di Safecom, partner di su ruman muhe Sheila Van Veen director di APHA. Su ruman muhe no a yama su persona despues di su aresto, y prome cu esaki contacto entre e y su ruman tabata minimal, igual cu su mama. Sr. Van Veen ta expresa cu e ta habri pa papia cu su ruman, sin su partner cual e no ta confia, como e ta e persona cu a atake den su cas (cas di e mama).
Cas y pertenencia
Ora Sr. Van Veen a wordo laga den libertad el a bay bek na un edificio cu solamente bentana y dos porta. E edificio tabata completamente bashi. “Nan a bay cu mi laptopnan, 3 guitara, piano y hopi cos mas personal, potret y video. El a yega cas y cu bulldozer nan tabata tirando tur cos pafo. “Ami a bay den e sushi y wak kico mi por a coy,” Sr. Van Veen a expresa.
Pa loke ta e pertenencianan cu Sr. Van Veen a perde, su abogado Sr. Crouch a bisa cu nan ta bay papia despues di kico ta e siguiente paso cu nan lo tuma.
Estado financiero y trabou
Den e caso di Sr. van Veen e ta menciona diferente biaha riba e limitacion cu tin pa motibo di placa. Aworaki Sr. Van Veen ta buscando trabou y ta den e proceso di entrevista. Te cu aworaki e no tin ningun cacho mas pasobra tur a wordo mata. Te awo e no a bay Asunto Social cu e situacion aki pasobra nan ta den proceso pa haya e pensioen di su mama di Hulanda cual e ta bisa cu ta suficiente pa e cuida su mama. “24 di mei e mester a haya su prome pensioen y tur e papelnan aki a wordo tira afo.”
Estado mental y profesion
Tambe a sali hopi informacion di estado mental di Sr. Van Veen den prensa y medio social manera Facebook. Ora cu a puntra Sr. Van Veen si e tin problema mental of historia, el a cuestiona e pregunta aki y el a bisa cu esey ta djis redo. “Por ta otro banda a pone como un anuncio, pasobra ami ta bon.” A mustra su persona riba henter e caso cu cacho morto rond y den frishider ta mustra manera ta hende loco ta biba den e cas. El a bisa nunca e tabatin problema mental y despues di e suceso tampoco el a haya ningun rapport psicologico.
Sr. Van Veen ta un IT, programmeur HBO di Hulanda. Y a traha 8 aña den gobierno. Y despues a sigui traha priva te cu 2010 unda cu el a haya algun problema laboral cual tin e sin por funciona como IT aki na Aruba. Na 2011 el a traha 2 luna na Safecom y nan no a cumpli cu su pago, “simplemente pasobra mi ta ruman di Sheila,” el a bisa. “Na e momento ey “Happy tails” tabata bayendo hopi bon, pues mi a dicidi pa stop di traha y inverti tur mi tempo den traha tempo completo cu bestia.” Te cu prome cu 2011 el a traha cu diferente compania manera Palm Tours, sinembargo na 2012 tabata full cu cacho.
Dog Whisperer
Terminando Sr. Van Veen a splica locual el a haci como Dog Whisperer. Na momento cu mi tabata haya hopi cacho di caya cu nan comportacion ta malo/brabo, for di e momento ey mi a cuminsa specialisa den comportacion di cacho y parha. Despues di trata basta cacho mi a ripara cu despues di mi tratamento nan ta bira manso, y cu e tecnicanan ta funciona bon y for di e momento ey, mi a bay afo como un Dog Whisperer cu ta gewoon un specialista di comportacion di cacho. Actualmente Sr. Van Veen no tin ningun cacho mas na “Happy Tails”.
