Darin Crouch abogado di Gilbert van Veen a yama un conferencia di prensa pasobra hopi cos a wordo publica ultimo dianan desde cu a detene Sr. Van Veen na su cas na Tanki Flip. Te cu awo tabatin solamente un banda di medaya cu a wordo duna unda cu a hasta papia cu famia di Sr. Van Veen entre otro, sinembargo su banda no a wordo duna.
Mirando cu diadomingo pasa Sr. Van Veen a wordo ataca den su cas a haya cu awo ta e momento pa bin dilanti cu tur informacion di su caso. Diadomingo pasa Sr. Van Veen a wordo ataca den su mesun cas unda cu a choke y sac’e for di su cas. Ora cu Sr. Van Veen a yama polis cual a presenta na su cas, nan no a tuma parti pa Sr. Van Veen kende a wordo ataca den su cas. Ora cu el a bay entrega keho na warda di polis na Shaba, polis a neng’e su derecho. Mester a pidi asistencia di officier pa e por a entrega keho contra di e persona cu a drenta su cas y atake, Sr. Crouch a splica.
“A yama e officier diadomingo mes kende a scucha nos, y e siguiente mainta 9or a haci e denuncia na recherche na Shaba. Mi tin entendi cu Alto comisario Dolfi Richardson a wordo poni na altura di locual cu a pasa. Mi ta spera cu ta bay haci un investigacion profundo di e situacion. Mi cliente a wordo maltrata, a kibra porta di su cas pa drenta y su telefon a wordo kibra door di e persona cu a atake.”
E hecho cu nan no kier a tuma su denuncia ta contra di su derecho, e abogado a enfatisa y pues kier splicacion.
Sr. Van Veen riba e caso di su detencion y cachonan mata
“Mi mama a cuminsa cu un hotel pa cacho na 2008, na 2012 nos a cay den problema financiero y desde e momento ey mi a cuminsa yuda Kiki cu tin un “no kill shelter”. E tabatin mester di un luga pa warda cachonan y e tabata paga mi pa esaki. Hasta polis tabata yama Kiki ora cu nan haya cacho. Si e cacho tabata bon, e ta haya doño lihe y ta bay Merca of Canada, pero ora e cacho no ta mustra bon, polis ta bisa yama Kiki, e ta bay tum’e. Hopi biaha e cachonan ta bin cerca mi. Mi tabatin 4 grupo den henter e propiedad di Happy Tails. Dos grupo dilanti cual a haya medicina caba. Un cacho por perde tur su cabey den un siman, pero e por tuma dos aña pa e cabey crece bek. P’esey nan tabata mustra malo, pero ya nan no tabata contagioso mas.”
Casi tur e cachonan tabata di Kiki di Animal Ambulance y Sr. Van Veen tabata yud’e. E tabata hiba 40 kilo di cuminda y e cachonan tabatin awa cu shelter, el a splica. Kiki ta paga un hende 10 pa 15 mil florin na veterinario tambe.
Tabatin un luga full patras separa di tur cacho, como cu esey tabata e grupo cu problema di cuero y nan mester a haya medicina. Segun Sr. Van Veen ta splica memey tabatin 13 cacho di su mes cu tabata hopi bon. Den e proceso y e forma cu polis a drenta y habri e cura, tur a bruha den otro y nan a mata tur su cachonan tambe den proceso.
Cachonan haya morto
Sr. Van Veen ta splica di e situacion cu a haya cantidad di cacho den saco morto y tambe den freezer. Ora cu un cacho di Kiki muri, e ora e ta pone nan den dobel saco di sushi y e ta yama Kiki cu ta busca e cachonan pa wordo dera. Ultimo par di luna Kiki tabata malo y de bes en cuando e no por a bay busca e cachonan mesora. Serlimar y Ecotech tampoco por a bay segun Sr. Van Veen, pues e ora nan a keda eynan.
Pa loke ta e cachonan den frishider, segun Sr. Van Veen nan tabata su cacho y den un forma hopi emocional el a splica cu el a conserva su cachonan den frishider. “Ora un cacho di mi muri, mi ta dera nan.” El a splica cu no tur ora e por dera nan di biaha, y mirando cu den dos dia e cacho ta cuminsa hole stinki e ta pone nan den freezer, manera cu ta haci cu hende na mortuario pa despues coba y dera nan.” Normalmente e cachonan ta sterilisa, sinembargo a haya algun cacho cu no ta sterilisa y nan a cay na estado. El a sigui splica cu hopi cacho chikito no ta haya chens pa crece pasobra nan ta haya Parvo y muri, y e ora nan ta bay den e freezer. El a enfatisa cu e freezer ey no ta wordo uza pa pone cuminda cu e y su mama ta come y ta solamente pa cacho e tabata uz’e.
Detencion
Despues di e hecho cu polis a bay su cas y bay cu e bestianan a puntra Sr. Van Veen a base di kico polis a bis’e cu a detene. (El a keda deteni un siman). El a splica cu despues di haci diferente diligencia parti mainta el a yega cas bek merdia pa duna su mama cuminda y net e tabata preparando su cuminda, cu e cachonan a cuminsa blaf. Ora cu el a mira, e ta wak un polis y despues e ta mira mas leu y ta wak un “cortina di polis” basicamente riba e tereno. “Mi a purba cera e portanan, sinembargo ya mi no tabata por. E ora nan a puntra si ami ta e doño y si mi ta mi so, pa despues a pone mi contra muraya y aresta mi.”
Nan ta culpa Sr. Van Veen di negligencia di su mama, Sr.Van Veen no ta comparti e opinion aki. E ta splica cu e cachonan ta bin cerca dje cu hopi problema, unda cu e hustamente ta duna nan medicina. Pa loke ta su mama, no tin hopi placa, pues tur cos ta bay na un saco di cement cada luna y cuminda p’e y su mama. Su mama ta come tur dia y ta ricibi medicina pa trata su Alzheimer. “Si ami ta biba na grandi y mi ta laga mi mama atras, esey ta maltrato. Sinembargo nos tur dos tabata den e mesun situacion.” Sr. Van Veen y su mama ta sigui tratamento pa cuero pa uitslag cu nan tin.
Mama di Sr. Van Veen, mientrastanto ta kedando na su ruman muhe Sheila van Veen cu ta director di APFA. Un ruman cu Sr. Van Veen practicamente no tin contacto cu ne. Desde e fecha ey Sr. Van Veen no a mira su mama y ta desea di ta cerca di dje.
