ORANJESTAD – Paralisis celebral ta un trastorno cu ta afecta miles di babynan y muchanan pa aña. Un mucha cu paralisis celebral tin dificultad pa controla musculonan di su curpa. Normalmente, e celebro ta bisa pa otro parti di e curpa kico mester haci y ki ora mester haci, pero ora un persona ta papia di paralisis celebral, esey ta nifica cu e mucha no por haci hopi cos manera cana, come, papia, of hunga manera otro muchanan.

Micky’s Foundation a nace for di un experiencia personal di su presidente, sr. Gijs Rooij. El a splica den un entrevista cu Bon Dia Aruba cu su yiu ‘Micky’ a haya un accident na aña 2009, ora e tabatin 5 luna di edad, pa via di un chauffeur cu tabata core auto burachi y a dal e auto cu Micky aden.

Pa via di e accident, e baby a sufri un daño den su celebro di casi 60%. Micky a bay Colombia pa por haya tratamento, y despues, ora el a yega Aruba, su mayornan tabata confundi pa motibo cu nan no tabata sa kico nan lo por haci pa Micky por continua cu su tratamento.

Rooij a bisa cu for eynan nan a cuminsa organisa un team di dokternan y terapista, expresando cu na e momentonan ey, esey tabata hopi dificil pa motibo cu despues di dos luna, Micky a haya epilepsia, entre 400 cu 500 convulsion Micky a haya pa cada dia.

Na Aruba den e tempo ey no tabatin dokternan specialista di neurologia di mucha. Despues di un aña, Micky finalmente a haya un operacion di celebro hopi exitoso, cu e epilepsia a disparce, un bon noticia pa su mayornan cu ora e tabatin 3 aña el a cuminsa desaroya su personalidad.

Rooij a bisa cu nan a busca terapia, pero a comenta: “Cu tur respet pa tur terapeuta cu ta traha akinan, pero na Aruba nan no a wordo educa pa trata specialmente cu mucha.” Loke nan a haya tabata un terapia di un ora pa siman so, ‘y esey no tabata sirbi, mester ta mas intensivo’ el a splica.

Ora Micky y su mayornan a bay na Corsou pa e haci terapia cu Dolphin Academy, nan a topa cu un mayor cu a bisa nan cu semper e tabata biaha cu su yiu y un terapista. Aunke esey tabata algo cu ta costa hopi placa, Rooij a haya e idea pa trece na Aruba terapistanan specialisa cu mucha for di Hulanda of Belgica.

Despues di un par di proyecto na Aruba, na aña 2015 Rooij a expresa cu hunto cu otro personanan, a crea e fundacion for di e idea ey, pa dos terapistanan por bin traha pa cada proyecto na Aruba durante tres luna, un fisioterapista of un terapista ocupacional cu ta ocupa di e movemento motorico, manera man y dede , asina tambe como logopedista encarga di e muchanan cu no por papia, pero nan ta comunica di otro manera sin uza palabra.

Pa cada proyecto, nan ta trata entre 25 pa 30 mucha, y pa cada aña, entre 40 pa 45 mucha. Desde aña 2015 cu nan a cuminsa cu e prome proyecto, nan a trata 90 mucha sin ningun costo. E fundacion ta conta cu e donacion di varios patrocinado cu ta convenci di e trabou cu Micky’s Foundation ta haci pa tur e muchanan por haya terapia.

Rooij a sigura cu nan a scoge e strategia di bay na e cas di famia, e fundacion no tin un sala di terapia. E terapista, ora nan ta na Aruba, ta haya un auto pa nan bay pa e cas di mucha cu su famia, y esey tin hopi bentaha pa motibo cu e mucha ta sinti su mes mas confortabel, y e terapista por siña e mayornan y e mucha pa facilita e ehercicionan den cas.

“Esey ta hopi importante pa nos structura, e metodo ey ta mas efectivo”, Rooij a bisa.

Di otro banda, Rooij a agrega cu e terapistanan no ta haya salario den e tres luna cu nan ta na Aruba. “Nan ta pasiona pa yuda mucha cu no tin hopi of casi nada di recurso, e ta mas un vocacion pa nan cu ta traha cu hopi pasion.” E fundacion ta encarga di duna pa nan cas, cuminda, auto y un beneficio pa gastonan personal di cada luna.

Rooij a comenta cu e grupo di persona cu e fundacion ta trata ta hopi aisla, y AZV no ta reembolsa rehabilitacion pa mucha. El a bisa cu desde cu e fundacion a cuminsa na 2015, nan tabatin 14 mucha, y pa cada aña e cifra ta aumenta, awo Rooij a manifesta cu e fundacion ta trata 90 mucha.

Cada proyecto cu e fundacion ta haci ta trata di tres luna, cu dos terapista ta bin for di Hulanda pa traha cu Micky’s Fundation. Despues nan ta bolbe bek y otro proyecto ta cuminsa cu otro terapistanan. E aña aki, nan ta organisa e proyecto 13 – 15, y pa 2020 e proyectonan 15 -18.

Den e fundacion e mayornan a crea e grupo ‘Parents Support Group’, cu e mesun mayornan a organisa pa duna sosten pa esunnan cu no ta conta cu apoyo of motivacion.

Pa finalisa, Rooij a sostene cu e ta haya cu e mayornan y e famia cu tin un mucha cu limitacionnan, ‘na prome luga stima e mucha igual cu otro mucha, dun’e atencion igual cu otro mucha, trata di wak e mucha for di e perspectiva di su posibilidadnan y no di su limitacionnan. Hopi di nan tin e potencial pa dentro di nan capacidad pa desaroya su mes fisicamente y mentalmente’.