Malinois, Herder Hulandes, pero hasta cualkier cacho crioyo no ta un co’i hunga sino un responsabilidad grandi. Esey ta opinion di Gibi Vrolijk di Elite K9 Club. Vrolijk y su compania ta completamente dedica na entrena y ofrece cuido na cachonan na Aruba, pero cu un enfoke riba e herdershondnan cu polis ta usa, cu ta e Mechelse Herder of Hollandse Herder.

“Ta cachonan bunita cu hopi hende a namora di nan. Pero no tur hende por maneha e cachonan aki, pasobra nan ta rekeri hopi atencion,” Vrolijk a bisa Bon Dia Aruba.

Gibi Vrolijk semper a gusta cacho. Semper e tabatin cacho crioyo ora, for di mucha cu a lanta na cas di su wela. E interes pa herdershond a nace ora cu Cuerpo Policial Aruba a atrae Dick van Leenen pa cuminza cu e unidad di cacho, e K9 Unit di KPA. Aki Vrolijk a solicita y a keda acepta pa forma parti di e unidad. Y su bida a cambia. Pasobra “eynan mi pasion realmente a lanta pa bay mas profundo den conoce e cachonan aki.” No solamente el a haya oportunidad pa traha cu e animal cu mas e ta admira, pero a haya hopi guia di e experto cu ta van Leenen. Na inicio, van Leenen tabata percura pa esnan cu ta maneha cacho conoce tur e pasonan pa por domina e herdershondnan aki pa haci trabao di control.

Specialisa

Vrolijk a sali di servicio di KPA y despues di un periodo den exterior a bolbe Aruba unda a acerk’e pa guia e organisacion cu a lanta pa train cacho. “Tempo cu mi tabata pafo di Aruba mi a sigui cu interes den e cachonan y nan entrenamento. Mi tabata sigui curso y seminario riba entrenamento di cacho, pa asina purba wanta na e conocemento.” Y unabes na Aruba, fundado di Elite K9 Club Dean Nicholson kende actualmente ta na cabez di e unidad di cacho di KPA a acerk’e pa yud’e cu e club. Nicholson tabata duda pa cuminza cu e actividad di deporte pa e cachonan, pa no crea e mal impresion interes priva y trabao. Asina a pidi Vrolijk pa tuma encargo. Asina a haya dos cacho cu potencial pa haci sport, despues di casi un aña ta traha cu cachonan pa haya les di obediencia.

Awor Elite K9 Club ta un organisacion specialisa den entrenamento di cacho, deporte cu cacho y demostracion educativo. Asina ta ofrece les na publico, riba tereno di obediencia di cacho y training di proteccion pa cachonan deportivo. E lesnan ta reparti den e programa di obediencia y uno ‘extremo,’ cu ta pa e cachonan cu ta haci deporte. “Nos tin tambe un grupo di hende, cu despues cu nan cachonan a caba e curso di obediencia, kier a sigui activo. Nan no kier stop y mas bien e entrenamento a bira un estilo di bida. Asina nos a lanta e grupo Avanza, unda tur siman ta keda train.” Ta trata di doñonan di cacho cu ta laga nan animalnan participa den e caredanan di obstaculo na varios luga diferente, unda mas tanto ta traha pa kita e ansiedad di e cachonan aki, “pa nan ta mas social den hende.”

Mordemento

Hopi biaha por mira demostracionnan con e Malinois ta ataca personanan bisti cu paña special y ta morde riba comando. Esaki ta un elemento di training pa e cacho cu ta haci e actividad aki pa sport. Den caso cu ta un polis di cacho, e animal ta haya training cu e por ataca personanan cu no tin paña special bisti, pero ta un proceso largo, cu ta rekeri hopi dominio. Pasobra hasta cacho di polis mester ta social y actua unicamente riba comando. “E training ta cuminza mescos. Pero cierto momento, pa un cacho di deporte e direccion di training ta bay un banda y esun di polis ta bay e otro.” Den otro palabra, tin diferencia grandi den con ta train un cacho di polis y uno di deporte.

Sea cu nan ta cacho pa traha cu polis of no, hecho ta keda si cu un Malinois, un herder Hulandes of cualkier otro ta rekeri atencion continuo. Gibi ta bisa cu mester traha tempo pa cana cu nan regularmente, pa evita cu nan ta bira inkieto. Y esey ta su meta, esta conscientisa comunidad cu no pasobra e cachonan aki ta mustra bunita, cu tur hende por tuma nan den cas.

Si no tin tempo pa e cacho, e situacion na cas por bira hopi dificil. “Y p’esey nos ta haya caso di hende cu simplemente no por cu nan y ta duna otro hende.” Of pio, ta laga e cachonan bay, cu consecuencia cu hopi di e cachonan crioyo a cuminza haya e caracteristicanan di un Malinois, mescos cu a pasa un tempo cu pitbulls.

No ta por nada cu Elite K9 Club ta activo den duna lectura y demostracion na gruponan, incluso scolnan rond Aruba pa educa hobennan riba cachonan aki, pasobra asina ta lanta doñonan consciente.

Pero, pakico train cacho so? Pakico no brinda mas servicio? Y ta esey mes Gibi Vrolijk ta haciendo awor. Cu e mesun disciplina cu e ta hinca den e training di e miho amigo di hende, e ta dedica na expansion di su negoshi, cu ta transporte di cacho pa cualkier servicio, esta Guardian K9. Gibi a logra algo cu hopi hende ta soña di dje, esta logra un trabao cu ta mas bien un hobby.

Pero no ta pasobra e ta un hobby, e no ta rekeri esfuerso y dedicacion. Di e mesun forma Vrolijk ta urgi tur hende na Aruba, cu pa prome cu tuma un cacho, y sigur un cacho cu tin un personalidad intenso, pa inverti tempo y dedicacion pa asina no mester laga otro cacho bandona pa motibo di “no por mas cu e animal.”