Awe tardi cuminsando pa 6or di atardi e grand autor di Corsou Gibi Bacilio lo duna un presentacion unico di su buki mas nobo na Biblioteca Nacional Aruba hunto cu Grupo Palabra Musikal.
Astrid Britten, Biblioteca Nacional Aruba, Departamento di Cultura Aruba y Gestor Cultural Mirto Laclé lo presenta un anochi literario pa presenta e tomo di poesia nobo, titula Fièrnu Selestial, di e autor Gilbert (Gibi) Bacilio ken lo ta presenta for di Corsou hunto cu Grupo Palabra Musikal.
Gibi Bacilio, naci na Corsou, ta autor, poeta, dirigente di teatro y artista di declamacion conoci. Den pasado Gibi tabata impulsor di teatro cayehero, activista comprometi. E obra Fièrnu Selestial ta contene 25 poema na Papiamento cu traduccion na Hulandes y na Ingles.
E lo ta un anochi multifacetico caminda publico por disfruta di musica, declamacion, charla y canto di Raquel Lampe, ganador di Un Canto pa Nos Himno y Bandera, ken lo deleita publico cu su cancion.
