Ta 2022 y e campaña di Pasco ya ta den pasado, pero e necesidad di hopi famia ta keda grandi. Y Gianaika van der Biezen di Fundacion Pa Nos Comunidad, e ta un realidad cu e ta confronta tur momento di su bida, hasta ora cu e ta cu vakantie. Van der Biezen a tuma un momento for di su famia pa expresa gratitud na comunidad pa a sostene e compra di e Ham di Pasco pa yuda famianan den necesidad gosa un poco di e ambiente di Pasco, unda entre otro por a pasa momentonan cu nan mesun famia ta come un ham tradicional.

Un producto cu pa hopi ta mustra asina normal den tempo di Pasco, pero cu pa hopi famia ta imposibel pa paga. Consecuentemente, FPNC a logra, danki na comunidad, cu famianan cu ta depende di e banco di cuminda pa nan prome necesidad por a sinti un poco di e ambiente di Pasco. “E ta prome biaha cu nos a organiz’e y famianan a keda contento cu n’e. Toch nan a sinti algo di Pasco y nan a bisa nos cu nan no a conta cu nan lo a ricibi algo di Pasco den cas. Y esaki toch a trece algo di alegria y parti di e cultura di Pasco di Aruba den cas. Ham no ta algo barata. Pero toch pa Pasco toch kier a haci algo diferente.” Mas ainda, un ham ta un producto cu ta nutriente y ta dura pa mas dia.

6 miyon

Pero e realidad ta cu aña a bolter y e urgencia pa sigui provee cuminda ta keda grandi. E proyecto cu FPNC mester a ehecuta pa Gobierno,  pa medio di Buro di Calamidad, esta sosten amplio di cuminda na gruponan cu ta cay den entre otro e categoria di refugiado y esnan cu a keda sin entrada pa motibo di e pandemia. Ta trata di gruponan cu tabata haya ayudo pa medio di Cruz Cora. Manera ta conoci, Hulanda tabata financia paketenan di cuminda y Cruz Cora tabata responsabel pa reparti esakinan. Pero na Juli 2021, Gobierno di Aruba a haya e responsabilidad pa e trabou aki, a reserva 14 miyon florin pa e proyecto cu  Buro Calamidad Aruba a keda encarga cu n’e. Ehecucion di e paketenan di cuminda pa bay pa FPNC. “Berdad a determina un suma di 14 miyon inicialmente, pero despues di screening y registracion, a baha e suma na 6 miyon,” van der Biezen a splica. “Cada luna e cantidad di famianan cu tabata ricibi ayudo a baha, di 6 mil te 3400 famia.” Pero e fondo aki tabata unicamente pa un periodo te cu December.

Sinembargo, awor e fundacion mester cuminsa colecta cuminda atrobe pa distribui nan na famia  of individuonan cu ta registra na FPNC. Van der Biezen a bisa cu ta kere cu e luna aki lo ricibi mas peticion y lo tin mas hende cu ta bay registra cu ta nifica cu tin un presion mas grandi ainda pa cuminsa 2022 cu hopi energia pa por colecta cuminda. “Esey tambe ta importante.”

Otro gasto

Ademas di necesidad di cuminda, hecho ta cu na Januari hopi famia ta haya nan mes cu otro tipo di gasto cu mester cumpli cu n’e. Y FPNC sa esey tambe, pero no por asumi e responsabilidad pa tal, pasobra ya caba e coleccion pa cuminda ta tuma hopi esfuerso.

“Riba dje nos mester tene cuenta cu e contagio di COVID. Na December nos tabata yuda 3400 famia activo. E cantidad mester baha e luna aki.”

Y e forma con ta haci’e ta pa determina kico ta e ayudo cu berdad e famianan mester, ken ta responsabel pa kico, si esunnan cu ta pidi ayudo ta cumpli cu e criterianan. E prome liña di ayudo ta keda Departamento pa Asuntonan Social y Wit Gele Kruis, y FPNC ta cay den e di dos liña di ayudo. E instancianan publico/semipublico ta manda e clientenan pa e banco di cuminda. Van der Biezen ta consiente si cu ta bay tin hende cu ta bay tuma contacto directo cu FPNC pasobra nan simplemente no por warda e proceso, y nan mester di come. “Ora cu acudi na Departamento pa Asuntonan Social, tambe mester warda pa un cita. Pues nos ta premira tur urgencianan aki.” Gianaika van der Biezen ta sinti hopi duele pa e hecho cu tin hopi famia y individuo cu ta preocupa pa e situacion insigur di Aruba y nan propio condicion di biba y e retonan cu tin, ya cu no tin cuminda pa pone riba mesa.

Particularmente pasobra “no a bin ningun fondo disponibel pa e banco di cuminda. Y no por duna algo cu no tin.” E luna aki ainda tin suficiente cuminda pa esunnan cu ta registra, pero FPNC mester inicia cu su recaudacion di fondo y tambe cu un campaña di conscientisacion pa comunidad cu ainda tin hende cu tin necesidad di sosten. “Hopi hende tin miedo di perde trabou, si mira e situacion di COVID. Mi ta kere hopi hende tin miedo di e situacion actual.” E miedo ta bin tambe pa e hecho cu e programanan di FASE y subsidio di salario tambe a caba. “Tur cos a stop pareu. Nos ta bezig ta trahando pa percura cu tin fondo pa sigui duna e famianan registra cuminda, pasobra mi no ta kere cu nan situacion lo mehora den e lunanan cu ta bin.” Van der Biezen ta enfatisa cu hopi di e famianan aki ta consisti di mucha cu mester di cuminda saludabel pa nan desaroyo.

“Berdad nos no ta mira hende ta mendiga banda di caya, pero tin hopi hende  ta biba bou e minimo di existencia, cu ta implica cu placa no ta yega pa un famia por sobrevivi.”

Con por yuda

FPNC ta spera di por haya mas donante regular cu ta permiti e fundacion cumpra cuminda y tambe boluntarionan pa yuda parti e paketenan di cuminda. “Tin biaha ta haya famia cu ta bin yuda  y tin famianan ta manda nan yiunan pa haci trabou boluntario den fin di siman. Nos ta agradecido pasobra e trabou ta hopi.”

Ta ricibi sosten di importadornan di cuminda pero otro reto na 2022 ta e realidad di inflacion. Productonan ta bira mas caro y FPNC kier sigura cu e paketenan di cuminda no solamente ta kita e hamber pero sigur tambe ta brinda e nutricion necesario, particularmente pa mucha.

Pa sostene e trabou di FPNC y yuda famianan den necesidad por tuma contacto cu e fundacion na 5880002, email na info@fpnc.aw. Riba e website www.fpnc.aw por haya mas detaye, incluso e cuenta di banco di e fundacion pa por haci donacion.