(AP) — Socialite Britanico, Ghislaine Maxwell a keda condena awe di a atrae adolescentenan pa miyonario Mericano Jeffrey Epstein abusa di nan sexualmente.
E veredicto a clausura un huicio di un luna largo, cu a conta cu relatonan miserable di e explotacion sexual di muchanan muhe di apenas 14 aña di edad, conta pa cuatro muhe kende a describi abuso durante nan adolescencia den añanan 1990 y inicio di añanan 2000, na e mansionnan di Epstein na Florida, New York y New Mexico.
E hurado a delibera pa cinco dia completo prome cu a haya Maxwell culpable di cinco di seis cargo. Cu e sentencia maximo pa cada cargo variando entre cinco pa 40 aña di prison, Maxwell ta enfrentando e probabilidad di añanan cera – un resultado busca pa largo pa muhenan kende a pasa añanan bringando den cortenan civil pa tene Maxwell responsable pa su rol den reclutamento y ‘grooming’ di victimanan adolescente di Epstein, y algun biaha, participa den e abuso sexual.
No a pone un fecha di sentencia.
E defensa a insisti cu Maxwell tabata victima di vengansa di un fiscalia diseña pa duna husticia na muhenan priva di nan villano principal, na momento cu Epstein a comete suicidio mientras tabata warda su huicio na 2019.
Durante e huicio, fiscalnan a yama 24 testigo pa duna e hurado un bista di bida dentro di cas di Epstein – un tema di fascinacion publico y speculacion desde su aresto na 2006 na Florida den un caso di abuso sexual di mucha.
Pero e centro di e huicio tabata e testimonio di cuatro muhe kende a bisa nan tabata victima di Maxwell y Epstein tempo di nan hubentud.
Tres a testigua usando prome nomber of pseudonimo pa protege nan privacidad: Jane, un actriz di television; Kate, un ex-modelo Britanico; y Carolyn, awo un mama recuperando di adiccion na droga. E di cuatro, psicologo Annie Farmer, a scoge di usa su nomber real despues di papia tocante su acusacionnan den añanan recien. Nan a echo otro den nan descripcion di comportamento di Maxwell: e tabata usa encanto y regalo pa gana nan confiansa, tumando interes den nan retonan adolescente y dunando nan siguransa cu Epstein por usa su rikesa y conexionnan pa realisa nan soñonan.
Nan a bisa cu e guion a tuma un birada scur na momento cu Maxwell a convence nan pa duna masashi na Epstein cu a bira sexual, encuentronan cu el a bagatelisa como normal: Despues di un masashi sexual, Kate, e tempo aya di 17 aña di edad, a bisa cu Maxwell a puntr’e si e tabata leuk y a bis’e: “Bo ta asina bon mucha.”
Maxwell, kende a cumpli 60 aña dia di Pasco, vehementemente ta rechasa e acusacionnan mediante su abogadonan. Asina mes el a nenga di tuma e riesgo di testigua, bisando e hues: “Gobierno no a proba su caso sin duda rasonable, pues no tin motibo pa mi testigua.”
“E acusacionnan contra Ghislaine Maxwell ta pa cosnan cu Jeffrey Epstein a haci”, un abogado di Maxwell, Bobbi Sternheim a enfatisa na e hurado. “Pero e no ta Jeffrey Epstein y e no ta mescos Jeffrey Epstein.”
Team legal di Maxwell a cuestiona si memorianan di e acusadornan tabata faya nan of tabata influencia pa abogadonan buscando pa haya hopi placa di Maxwell y di patrimonio di Epstein den corte civil. Durante nan presentacion di dos dia, nan a yama como testigo Elizabeth Loftus, un profesor kende a testigua como experto di memoria pa abogadonan di defensa na alrededor di 300 huicio, incluyendo e huicio pa violacion contra magnate di pelicula, Harvey Weinstein.
E peleanan legal involucrando Epstein y Maxwell no a caba.
Maxwell ainda ta wardando huicio pa dos cargo di perhurio.
