El a participa den ‘Festival di Un Canto na Aruba su Himno y Bandera’ fin di siman ultimo, na unda el a sali como ganado absoluto den categoria adulto cu e cantica cu ritmo di wals “E Bida Akinan”. Den un entrevista special cu Bon Dia Aruba, Ghislaine Grant ta conta un tiki mas di su experiencia den e festival aki y di su bida personal.

Diadomingo ultimo 12 di maart, Grant a presenta na Festival di Un Canto na Aruba su Himno y Bandera cu e grupo Tipico Suona interpretando un cantica cu ta resalta Aruba su cultura y sentimento, cual a wordo composita pa Lurena Schwengle y tabatin como areglista Raul Piar.

Ghislaine Grant a nace na Aruba y ta un mama di dos yiu. El a conta cu el a biba un tempo afo pa studia na unda el a conoce e persona cu ta su casa na e momentonan aki y despues el a bin back Aruba.

“Mi pasion ta canta, mi casa tin un iglesia na Aruba y ami hunto cune ta pastoria e iglesia y loke ta cantamento y gospel, esey ta loke mi ta haci,” el a bisa.

E ta un persona cu ta traha na un banco local y su tempo liber e ta dedic’e na su famia. E ta gusta lesa buki, tambe e ta dedica na actividadnan cu ta wordo organisa na iglesia, e ta encanta cu tur diadomingo despues di iglesia e ta bay cerca su mama cu su tata cu ta gusta cushina pa pasa un dia dushi den famia: “esey ta cosnan cu ta empodera bo,” Grant a sigura.

Di loke ta trata su participacion den Festival di Un Canto na Aruba su Himno y Bandera el a declara cu “esey tabata un yamada. Mi ta kere cu si e yamada ey no a drenta, mi no ta kere cu mi a participa,” el a sigura.

Pero esaki no ta prome biaha riba un escenario pa Grant manera el a comenta. Raul Piar, ken ta e areglista di e cantica cu el a interpreta, ta conoc’e di eventonan di Dia di Betico of eventonan di dia 18 di maart cu ta trata di concierto. Pa hopi biaha Grant a wordo pidi pa e canta. Piar y Lurena Schwengle, ken ta compositor, a acerca Grant na comienso di aña aki pa asina pidi’e si e por ta e persona cu por interpreta e cantica ‘E Bida Akinan’.

“Ora cu nan a pidi mi e ora ey si mi no a duda. Mi a haya e oportunidad hopi bunita pa mi por ta parti di e unico festival cultural di Aruba y asina bo por duna honor na e pais cu bo ta biba riba y pa mi esey ta hopi importante di usa mi talento cu Dios ta duna mi pa mi por encurasha un otro persona. E ora mi a bisa si di biaha,” Grant a expresa.

Ora el a lesa e cantica pa prome biaha, e tabata sa cu Raul Pinar manera el a enfatisa “ta un compositor increibel”. E no a duda den ningun momento cu su letranan ta bunita pero e no tabata sa kico tabata e contexto di e cantica: “mi no tabata sa kico tabata spera mi. Ora mi a lesa unda ta papia di Arubianonan no vence, unda ta papia pa nos por balora y gradici loke actualmente nos tin, ora m’a cuminsa cant’e completo pa training, e palabranan a penetra completo. Mas y mas el a bira un cantica cu a bira parti di mi y cu mi a encanta enormemente.”

Pa su persona, esaki ta un sentimento y un experiencia cu nunca el a yega di sinti, ora el a wak su famia dilanti stage y tur e personanan cu tabata duna su apoyo na dje diadomingo ultimo na momento di interpreta e cantica cu a dun’e e merecido premio absoluto di e festival.

“Tin hende cu ta bisa cu door cu mi ta custuma canta dilanti publico, mi sa caba kico esey ta, pero esaki ta algo totalmente diferente. Dilanti bo tin bo famianan pero hende cu tambe bo no ta conoce y pa bo wak nan con nan ta disfrutando di e cantica, cu cada palabra penetrando den nan curason y pa despues nan bati man pasobra nan ta sintiendo loke a bo ta purbando di carga nan, ta increibel di berdad, e ta bunita pa wak esey,” Grant a señala.

Tambe el a informa cu e ta bay participa dia 17 di maart hunto cu Cris Kross den e concierto riba Plasa Betico Croes y despues di esey e ta bay wak kico lo sigui pa loke ta trata proyectonan musical: “pero pa mi semper ta un honor pa mi por haci esey. Pa mi ta hopi importante cu a traves di canto por laga un hende sinti y wordo inspira.”

Pa finalisa, Grant a laga como mensahe: “balora loke nos tin y den kico cu nos por ta pasando den dje, con dificil e por ta, pa nos sa cu nos no por rindi. Nos tin cu sigui pa dilanti y Aruba di berdad por ta chikito, pero nos ta bendiciona pa por biba ariba un isla cu ta yama Aruba.”