A pone un post riba facebook cu menasa den direccion di gezaghebber, diputadonan Kroon y Den Heyer y tambe e ex diputado y actual lider di fraccion di MPB Tjin Asjoe.
Como gezaghebber cu repudio mi a tuma nota di e post cu nan a pone den forma anonimo aki. Den e estado di derecho cu nos ta biba, tin tur espacio pa discusion tocante maneho di gobierno y pa critica gobernantenan individual. Pero nunca no tin mag di tolera pa intimida of den e caso aki menasa personanan, sea cu nan ta gobernante of un simpel ciudadano’, segun gezaghebber Rijna.
Mi a haci denuncia na Ministerio Publico y mi a conseha e otro personanan cu tambe nan ta menciona den e post, pa nan tambe haci denuncia. Pero mi ke enfatisa cu e suceso aki no ta solamente un caso di husticia. Ta importante pa nos como comunidad distancia nos mes for di expresionnan riba medionan social cu ta crusa tur liña y cu esaki mi ke men mensahenan insultante y/of ofensivo tambe. No comparti esakinan, pero kita nan inmediatamente y den caso cu bo conoce e persona cu a manda nan: hala nan atencion riba e cosnan aki.
Boneiro ta un comunidad chikito cu tin biaha diferencianan grandi di opinion. No tin nada robes cu esey, basta si nos keda realisa nos mes cu nos tin mester di otro pa haci nos isla un miho isla pa e generacionnan cu ta bini despues di nos. Pa e motibo aki mi ta haci e siguiente yamada: laga nos anda cu otro na un manera respetuoso. I na e persona cu a pone e post cu menasa mi ta bisa: laga nos traha un cita, di manera cu bo por conta mi kico ta e cos cu ta molestia bo, segun gezaghebber Rijna.
