Ayera mainta a keda divulga cu e fugitivo Gerson Martina a cay bek den man di nos autoridad. Minister di Husticia, Andin Bikker (POR) a duna oficialmente mas detaye di e echo aki. For di diaranson caba tabatin indicacion cu Martina tabata kier entrega su mes.
Ta asina cu despues cu diadomingo ultimo nos comunidad a wordo confronta cu e noticia cu un di dos preso a huy for di KIA den menos di un luna, locual a causa conmocion, ayera mainta durante un conferencia di prensa e mandatario a confirma cu Martina a keda deteni bek.
Apesar di indicacion cu e fugitivo tabatin intencion di entrega su mes boluntariamente na autoridadnan, e proceso aki no a tuma luga y autoridad mes a detene e fugitivo den bisindario di Bubali. Segun e mandatario, e fugitivo a keda deteni den un apartamento cu a wordo construi riba tereno di su mayor.
Relaciona cu e caso aki, e mandatario a laga sa cu den e mesun momento cu Martina a huy, a start investigacion interno pa evalua si fayo humano a wordo cometi. Esaki a haci cu dos personal di KIA a keda suspendi, mientras un investigacion interno ta tumando luga y e proceso di trabou interno ta wordo analisa.
E minister en cuestion a indica cu nan lo mira con e proceso di trabou ta bay, y si esaki a wordo respeta pa nan wordo mehora. Pero el a prefera di no anticipa mas detaye riba e punto aki, ya cu ainda e ‘analisis interno’ no a bin cla.
