Tanto e docente como e alumno ta hende y prome cu tur cos mester mira nan como persona. Esey ta e filosofia di Cabezante di scol MAVO, Colegio San Antonio, Gershwin Lee.
Lee a caba di supervisa un ‘strafmiddag’ ora cu a papia cu Bon Dia Aruba. Un grupo di alumno disgusta cu nan mester a pasa un diabierna merdia na scol no ta exactamente un situacion ideal. Pero e cabezante no ta laga ningun oportunidad pasa pa conecta cu su alumnonan. “Nan ta sinti cu e docente no ta gusta nan, nan a bisa mi. Hopi biaha ta trata di un docente cu a duna nan un mal punto.” Y locual Lee a bisa nan cu door di haya mal punto, e hobennan ta reenforsa e malimpresion cu e docente por tin di nan, pero cu e consecuencia ta pa nan mes.
E tabata sa di cua docente e muchanan tabata papia, cu ta un hende cu tin interes, pero ta hiba un liña mas stricto. Ora cu e cabezante a puntra e hobennan pakico no ta haci nan esfuerso, e contesta tabata “mi no kier pa e docente pensa cu mi ta chupado.” E momento ey, Lee a tira nan un reto, pa puntra e docente directamente si e ta kere cu nan tin perspectiva. “Mi a bisa nan cu nan lo keda sorprendi cu e contesta. Pasobra mi ta sigur cu e docente lo bisa nan cu si e ta kere den nan, basta cu nan aplica nan mes.”
Despues di e combersacion, Lee a pone e hobennan mira e documentario di gimnasta Simone Byles, kende a pesar di mayornan cu tabata adicto cu no por a pone atencion na nan yiu, te cu e welonan a adopt’e. “E diferencia ta e ‘mindset.’ E idea tabata pa e alumnonan realisa cu trauma no mester ta un estorbo. Tur hende tin un trauma. Un mucha cu a haya un grito di su juffrouw ora cu e tabata den eerste klas pa motibo di tabata lesa malo, lo keda cu un trauma. E punto ta con ta anda cu e trauma.”
Kizas e aspecto mas sorpresivo ta cu Gershwin Lee a conta e alumnonan cu e tambe a experiencia un hubentud cu reto. Su tata, difunto Atan Lee tabata un mayor extramadamente stricto cu no tabata duda den usa disciplina fisico, y tabata exigi perfeccion escolar di su yiunan. Gershwin como e mayor di tres, a rebeldia. Su puntonan den MAVO no tabata di gaba. Y su rebeldia a sigui te despues cu el a caba HBO. Su tata tabata soña pa su yiu haya e titulo ‘drs’ y Lee a yega te na su tesis y a dicidi pa no haci’e. El a informa su tata, cu obviamente a keda desapunta, pa despues bay Spaña, unda el a haya su Masters den Business Administration, cu specialisacion den mercadeo y relacion publico.
E trayectoria sinembargo a pone Lee realisa pakico su tata tabata asina enfoca pa su yiunan logra. “Mi tata a lanta pober, den un famia grandi. Un muchahomber di descendencia Chines cu tabata victima di ‘bullying’ cu a logra supera su mes y tabata kier e miho pa su yiunan. E mes no por a kere cuanto el a logra. Ningun hende a kere den dje ora e tabata mucha.” E realisacion cu e exigencia di su tata ta resultado di trauma, a permiti Gershwin accepta cu e disciplinario tabata un tata cu simplemente tabata stim’e y tabata kier e miho p’e.
Y ta e storianan aki Lee ta conta alumnonan na Colegio San Antonio. Esey sinembargo, no ta nifica cu no mester reconoce e dificultad cu algun alumno ta pasa aden. Pasobra hopi biaha e actitud fresco y halza ta pa sconde e falta di amor di un mayor, of e hecho cu e famia ta simplemente ta pober. Actitudnan asina ta haya nan refleho den prestacion y mayornan tin biaha no ta compronde. Gershwin ta aplica e mesun acercamento humano cu mayornan, algun cu tin biaha por acudi na scol hopi rabia.
For di trempan, for di tempo cu e tabata docente, Gershwin a ripara cu e miho forma ta pa mira e alumno, e mayor, e colega como hende prome, den un forma holistico. Pa tal motibo tambe, e ta importante pa Gershwin tin contacto personal cu mayornan, pa realmente conoce nan. Y e ta haci tur e mesun pregunta. “Con a bay bo dia ayera. Con bo a lanta mainta, kico bo a come.” E forma aki di mustra interes, ta basha murayanan abou y ta permiti yega mas cerca di e hende pa asina por yega e nucleo di cualkier conflicto. Un alumno (cu no ta un ‘repeat client) cu yega cerca dje pasobra su docente a sak’e di klas, no ta bay haya un reclamo, sino ta bay cerca un persona cu kier sa mas kico ta den bida di e alumno. “Mi ta wak kico ta su miedo, su duda, su complehonan, si e tin miedo.”
E forma con Gershwin Lee pues ta atende cu hende, ta mas bien manera un ‘coach’ y no un disciplinario stricto. E no ta kita afo cu tin regla pa cumpli cu n’e, pero pa exigi e cumplimento, Lee ta kere cu ta esencial pa logra motiva e alumno, of tambe e docente, cu nan mes kier traha na mehoracion.
Kizas e ta parti di su personalidad, pero Gershwin Lee a splica cu for di trempan el a ripara e importancia di un acercamento diferente y a sigui tur e cursonan y entrenamento posibel riba e area, for di Conscious Discipline te yoga, cu ta brinda tecnicanan pa yuda cualkier hende hala rosea y trankilisa.
E resultado ta bisto tambe. Pasobra Colegio San Antonio ya tin añanan ta encabeza e lista di scolnan cu miho porcentahe di graduacion. Pero ni esey ta locual ta motiva e cabezante. “Si mester tuma e prome periodo di examen aña pasa, nos scol tabata esun cu pio resultado. Tabatin e posibilidad pa tur alumno laga e punto mas abou cay (areglo ‘streep weg’ pa motibo di pandemia) y toch gradua. Pero mi tabata bisa nan pa toch tuma e herexamen pa hisa e punto.”
E cabezante tabata motiva su alumnonan pa confia den nan mes y tabata sigura nan cu nan lo gradua. E resultado di e scol riba su mes como tal no tabata importante pa Lee. Su obhetivo ta pa alumnonan por crece y realisa nan potencial, y ta hende feliz. Un acercamento cu a demostra di ta traha.
