E sonrisa semper tey y e pasenshi tambe pero esey no ta un esfuerso pa Front Services Manager di Aruba Hilton Resort, sino parti di su pasion pa su trabou.

Germaine Wever semper a gusta comunicacion y a kere cu su trabou lo ta den periodismo. Y como hoben, el a haci entrevistanan pa e programa InTop na TeleAruba. Particularmente tabata haci entrevista pa mustra kico tabata e opcionnan pa hobennan scohe un profesion.

Y ta durante un di su entrevistanan, el a bishita Aruba Hotel School, e tempo ey na Bushiri Hotel y su futuro a keda determina for di e momento ey. Germaine a namora di e idea di traha den turismo y a scohe pa bay AHS. “Mi a drenta scol di hotel di turismo cu 19 aña y mi no a sali nunca mas for di e mundo di hotel.”

Beca

E estudio na Aruba tabata cubri pa un beca di Sun Development y danki na Aruba Scholarship Foundation, e hoben a caba su estudio superior na Florida International University cla pa conquista e industria turistico di Aruba. “Mi ta hopi gradecido cu mi por a ricibi e becanan. Mi mama tabata viuda, no tabata traha. Mi tata a muri y mi no tabatin ningun sosten financiero di e banda ey.” E famia no tabatin forma pa paga un estudio na Merca pa mi.” Pa sostene su mes y paga diferencia nan cu e beca di Aruba no tabata cubri, Germaine tabata haci uso di tur e becanan chikito cu e universidad mes tabata ofrece y a haci tur su esfuerso pa keda cu su puntonan halto pa asina keda cualifica pa e sosten financiero.

Mientras cu e tabata na Merca, Germaine a traha na dos hotel, incluso un Best Western, pero asina cu el a haya oportunidad, el a bolbe Aruba unda el a traha na Wyndham y despues a bay Radisson Hotel. Mientras tanto Radisson a bira Hilton, pero pa Germaine, e cambio tabata unicamente e nomber, pasobra e tabata na su cas pafo di su cas.

Trabou cu pasion

Y pa Germaine, e hotel ta parti di subida y su coleganan ta manera su famia. Su media social ta ilustra e alegria cu Germaine y su coleganan ta expresa ora nan ta hunto, hasta den temponan dificil. “Mi ta gosa hopi di mi trabou. E duna hopi satisfaccion.” Pero, hasta Germaine Wever mester admiti cu no tur ora traha den turismo ta facil. Pasobra traha cu hende no ta facil. “E ta un ‘love-hate relationship,’” el a splica. “E ta un pasion, manera den cualkier relacion. Mescos cu den un matrimonio. Mester mantene e pasion bibo, pasobra si no, e ta bira un rutina.

 

Y traha den e sector no ta bira un rutina, si por busca e aspecto nan bunita di turismo. “Ta trata cu hende tur dia. Y no tur hende ta mescos. Cada persona cu bo atende ta diferente. Y si no tin e pasion, si no tin e coneccion, e no ta bay.” Y e relacion dedica ey no ta unicamente cu e bishitante, sino tambe cu empleadonan, cu coleganan. “Mester traha cu diferente departamento. Y tin biaha bo ta odia e circumstancianan, pero mayoria biaha bo ta gusta.”

Cliente hopi special

Tur cliente, tur bishitante ta special. Y tur ta sinti nan mes special pasobra nan a paga pa bin Aruba, cu no ta un destinacion barata. Como e persona encarga cu front desk, Germaine a experiencia hopi cu no tabatin problema pa expresa nan disgusto. Pero, Wever ya no ta mira turista, clientenan rabia como un problema. Es mas, e ta parti di e trabou y e sa con pa maneha un situacion asina. “Mi ta kere mi ta asina hopi tempo den e trabou, cu e ta bin di mes.”

Su acercamento ta simpel. Djis scucha e cliente. “Ta e basico cu bo ta siña. Esta scucha e turista, sinceramente. Mustra empatia. Y semper mester pidi despensa. Tur ora pidi despensa, perona un forma sincero tambe. E despensa mester ta genuino. Bo mester hinca bo mes den e otro persona, pasobra e lo ripara e diferencia.”

Y e recompensa ta mas cu djis un cliente trankilisa. Germaine a experiencia diferente turista cu e mester a atende, cu tabata rabia y cu awor ta amigonan real. “Varios di nan. Pero esun mas cu a keda cu mi, ta un meneer Britanico, cu hunto cu su casa a biaha rond mundo, y ta bin Aruba tur aña (cu excepcion den e pandemia).” E turista tabata hopi rabia cu algo den su kamber y bay Front Desk na Radisson pa zundra. “Mi ta corda cu cierto momento el a cana bay, pero despues e mes a bolbe pa disculpa pa su reaccion. Y di e dia ey, nos a bira hopi bon amigo. Te hasta e tabatin bin come na cas cu mi famia, of cu nos ta bay come hunto.” Esey ta aspectonan bunita di e trabou cu ta duna hopi satisfaccion, Wever a conta.

Y aunke cu un critica di turista ta cay duro pa comunidad, en general, Germaine ta scucha mas tanto comentario positivo. Un turista a bis’e un dia cu Aruba realmente ta ‘One Happy Island’ y a duna como motibo cu su casa, normalmente ta lanta tur mainta ta zundra. “Awe el a lanta contento,” e huesped a conta Germaine.

Maneho di desperdicio pa scapa turismo

Pero aunke no ta tende hopi critica di turista nan mes, Germaine Wever ta kere si cu pa por mantene nos turismo solido, Aruba mester cuminsa pone atencion na nos espacio y medio ambiente. Tin mas edificio y e problema di desperdicio ta enorme. “Na mi cas mes nos ta yena un saco di sushi tur dia. Corda un hotel y tin asina hopi mas hotel.” Pues pa sigura cu turismo por sigui, mester enfoca atencion awor riba maneho di desperdicio, ta e conseho di e profesional.

 

Y motibo pakco mester proteha medio ambiente, ta pasobra turismo ta sigui brinda oportunidad na hobennan awor, mescos cu a duna perspectiva profesional na Germaine di 19. “Pero mester ta consiente cu e ta un trabou duro, cu e oranan ta largo. Unabez cu scohe pa e trabou aki, bo mester sa cu un dia di trabou no ta 8 ora tur biaha. E ta mas bien 10 pa 11, y mester traha durante dia di fiesta, riba Diadomingo. Pero si bo ta gust’e, y bo tin pasion pa e trabou, e ta bay hopi bon.” Y pa awor, aunke de bes encuando e ta pensa cu ta ora pa stop, Germaine Wever lo keda traha den e industria cu a brind’e un carera y ta base economico di Aruba.

Entodocaso, Aruba por ta orguyoso di tin un embahador ta traha ya pa mas di 25 aña den e industria, un persona cu ta contribui na e exito di turismo di Aruba.