Ayera nochi, riba Dia Internacional di Democracia, parlamentario independiente Gerlien Croes a anuncia su partido nobo, Futuro, na caminda pa eleccion dia 6 di december binidero.
Croes, ken a cuminsa su carera politico riba lista di partido AVP y eventualmente a bandona e partido, a anuncia su partido politico nobo, Futuro, durante un evento na Casibari Rock Formation ariba Dia Internacional di Democracia.
El a remarca cu el a scoge e Dia Internacional di Democracia specificamente pa lansa su partido pa duna inicio na biba democracia na Aruba y duna espacio y oportunidad pa cambio di pensamento politico na Aruba, cu idealnan grandi y anhelo pa cambionan grandi por tuma luga.
Durante su discurso, Croes a enfatisa e necesidad pa transparencia, union, representacion y respet pa e pueblo di Aruba.
Despues di su discurso, Bon Dia Aruba a puntra Croes tocante e lista di personanan cu lo forma parti di su partido pa e eleccion binidero. E parlamentario independiente no a duna detaye pero a indica si cu no tin un limitacion di cantidad di persona cu lo por subi lista di partido Futuro y cu e anuncionan lo cuminsa tuma luga durante e simannan binidero.
A puntra e lider di e partido nobo si Futuro haya e oportunidad pa sinta den un gobierno di colacion, si tin algun partido cu nan lo descarta pa forma coalicion cune, Croes a remarca cu lo mester warda pa wak kico e resultado di eleccion lo duna.
El a agrega cu si ta papia di futuro y cu durante su discurso el a menciona division y desunion den e comunidad, locual cu nan kier ta lo contrario y el a subraya cu e ta abierto pa combersa na bienestar di pais Aruba.
Por ultimo, pa loke ta trata ideologia di su partido, Croes a indica cu esaki ta un movecion progresivo, pero a base di e norma y balornan di pais Aruba.
