Ayera tardi despues di ceremonia di huramentacion di e 12 constelacion di Parlamento di Aruba, a tuma luga e di shete reunion publico y prome pa e constelacion 12 di parlamento, durante cual a tuma luga e votamento pa presidente y vice presidente di parlamento.
Parlamentario di fraccion MEP, Shailiny Tromp-Lee, ken den e constelacion anterior tabata fungi como vice presidente di parlamento a presidi e reunion como presidente di parlamento. Esaki pa motibo cu Tromp-Lee si a logra drenta parlamento despues di eleccion di dia 6 di december y e anterior presidente di parlamento, Raymond Kamperveen, no.
Primeramente Tromp-Lee a duna un splicacion amplio di con e proceso di votamento ta tuma luga. Esaki specialmente pa parlamentarionan nobo cu pa prome biaha ta drenta parlamento ta na altura di e proceso y reglanan importante cu mester tene cuenta cune.
Tromp-Lee a anuncia e comision di tres parlamentario cu tabata encarga cu conteo di votonan. E comision aki tabata consisti di Rocco Tjon (MEP), Mike de Meza (AVP) y Gerlien Croes (Futuro).
E proceso di votamento tabata consisti di cuater tanda. Durante e prome tanda e parlamentarionan a vota pa e prome nomber pa candidato pa presidente di parlamento, durante e di dos tanda a vota pa e segundo nomber pa candidato pa presidente di parlamento. Durante e di tres tanda a vota pa e prome nomber pa candidato pa vice presidente di parlamento y durante e ultimo tanda a vota pa e di dos nomber pa candidato pa vice presidente di parlamento.
Ta vota pa un di dos nomber den caso cu su Excelencia Gobernador di Aruba Alfonso Boekhoudt ta mira algun obstaculo pa confirma e prome nombernan pa presidente y vice presidente, tin un segundo opcion pa recuri na dje. Pero esaki ta algo cu usualmente no ta pasa.
Resultado di votamento pa presidente di Parlamento di Aruba a keda como lo siguiente: parlamentario Gerlien Croes di partido Futuro a keda eligi como presidente di parlamento cu 20 voto na fabor y cu un voto nulo.
Pa loke ta vice presidente di parlamento e resultado a keda como lo siguiente: parlamentario Mervin Wyatt Ras di partido AVP a keda eligi como vice-presidente di parlamento cu 12 voto na fabor y 9 voto a bay pa parlamentario Shailiny Tromp-Lee di partido MEP.
