Gerlien Croes (AVP): A comparti informacion hopi valioso riba Covid-19 durante Brainstorm Sessie

Diahuebs anochi, 20 di augustus a tuma luga un Brainstorm Sessie na Renaissance Convention Center, pa e delegacion organisatorio di AVP, caminda cu tabata tin varios orador durante e nochi aki y kendenan ta experto riba varios tereno pa loke ta e pandemia di Covid-19, su complicacionnan, retonan, solucion y recomendacion den dos panel.

Mr. Gerlien Croes tabata un di e oradornan presente y no tabata t’ey no solamente como parti di e delegacion organisatorio di e partido, pero tambe como ex-pashent di Covid-19.

El a splica cu a invit’e no solamente como miembro di partido, pero tambe como un ex-pashent di e virus, pa asina duna un contribucion y scucha un tiki mas pa e mes como un ex pashent, por haci un analisis, haci su preguntanan pa loke ta e situacion actual cu Aruba ta pasando aden.

E tin cu bisa cu e tabata un sesion sumamente interesante. Hopi informativo y a haya datonan cu no ta conoci. Aki por a haya un miho bista di kico ta pasando. Esey tambe ta identifica retonan cu tin den henter e sistema di maneho cu no ta general actualmente pa loke ta e crisis na Aruba.

Croes a indica tambe cu tur presentacion tabata sumamente informativo. E presentacion en particular di e team di maneho di e crisis ta uno cu a duna hopi dato specifico y importante pa e comunidad tambe por compronde decisionnan cu ta tuma, pa loke cu ta protocol, medidanan cu ta tuma.

Locual si ta remarcabel ta cu toch tin un falta di comunicacion internamente den e organisacion, team y e parti externo, segun Croes, cual ta su propio conclusion.

Un ehempel specifico ta aeropuerto, caminda cu nunca e por ta waterdicht. Na momento cu ta comparti cu comunidad cu Aruba ta “free of Covid-19”, por ta toch e comportacion di comunidad ta bira diferente, cu si bo ta anuncia di antemano cu mester semper tene cuenta cu e no ta waterdicht manera cu nos ta desea.

Croes ta di opinion cu comunicacion, transparencia, dato y responsabilidad civico ta hopi importante. Esey por ta falta un tiki di honestidad. Pero nos tin cu wak p’adilanti.

Tabata tin mas di 16 stakeholder presente cu a comparti informacion hopi valioso. Na e momentonan aki nos ta den un crisis catastrofico pa Aruba y cu nan ta duna nan tempo pa bin comparti. Ohala cu lo por tin mas transparencia den e dia y simannan venidero pa comunidad por tin un miho bista di locual nos ta pasando aden.