E director general di e empresa procesado di carni mas grandi di mundo, JBS, a wordo aresta ayera na Brasil bao sospecho di manipula e mercadonan financiero.
Polis y un representante di e empresa JBS a bisa cu a detene Wesley Batista na Sao Paulo.
Batista y su ruman Joesley, ex-presidente di e directiva di JBS, a expresa den acuerdo cu fiscalia cu e empresa a paga soborno na decenas di politico, entre nan presidente Michel Temer. E ultimo aki ta nenga di a comete algun delito. Parlamento Brasileño a pospone e investigacion riba Temer te ora e baha di su puesto di presidente, manteniendo su inmunidad te e momento ey.
Pero e aresto di Wesley no ta relaciona cu e caso cu ta envolve Temer, sino na transaccion sospechoso cu accion di JBS y un compra inusual di dollar di e empresa cu a dun’e ganashi grandi.
A emiti un orden di aresto pa Joesley tambe, aunke e director aki ta preso desde diadomingo, relaciona cu e caso di soborno cu ta inclui presidente Temer. E orden di captura pa ambos a sali ora a surgi interogante encuanto si a sconde informacion durante nan declaracion na fiscalia.
