Den e investigacion di e scandal di soborno di e empresa Brasileño Odebrecht, Fiscalia General Colombiano a haya otro capitulo di corupcion, cu lo hiba dilanti hues e ex gerente di campaña electoral di 2014 di actual presidente Juan Manuel Santos, Roberto Prieto.
E caso nobo di investigacion tin di haci cu e proyecto Ruta del Sol III, un proyecto miyonario cu a keda otorga na 2010 na e compania Yuma Concesionaria, di cual e socio mayoritario ta e firma Italiano Salini Impregilo, pa e construccion y rehabilitacion di 465 kilometro di caretera den un periodo di seis aña.
Den e negoshi aki tabatin un adicion pa e construccion di e Puente Plato, na Magdalena, y ta na e momento ey cu Fiscalia ta considera cu e actuacion ilegal di Prieto lo a tuma luga.
Roberto Prieto Uribe, presuntamente, a uza influencia di manera determinante cerca e Agencia Nacional di Infrastructura (ANI) cu e meta di logra e adicion di e contracto Ruta del Sol III a cargo di Yuma Concesionaria S. A., segun un comunicado di prensa di e entidad acusado.
Fiscalia General a anuncia diahuebs pasa cu dia 26 di februari proximo, lo entama e caso contra Prieto dilanti un hues di Paloquemao, pa delito di trafico di influencia, interes indebido den celebracion di contracto, enrikeciendo ilicito y falsedad den documento priva.
E investigacion di Fiscalia ta indica cu Pietro lo a obtene 650 miyon peso pa su intervencion cerca ANI. E placa ey lo a yega na su man a traves di un pago haci na e firma Megaland S.A.S., un empresa fantasma cu lo a sirbi di intermediario pa e soborno miyonario.
Fiscalia tin testimonio y prueba cu lo ta demostra cu e influencia di Prieto tabata tambe bao di e condicion cu e estudio y diseñonan di e brug di e caretera Plato-Zambrano lo a keda na encargo di e empresa Consultores Unidos S. A. di e polemico empresario Eduardo Zambrano, preso pa e caso di Odebrecht.
Pa e estudio y diseñonan aki, ANI a firma un addendum di 5.788 miyon peso.
Precisamente Eduardo Zambrano, cu mester responde dilanti husticia pa reparti soborno, pa e empresa Brasileño Odebrecht por a keda cu e adicion di e via Ocaña Gamarra den e Ruta del Sol II, ta un di e principal testigonan den e investigacion nobo aki contra Prieto.
