Na december ultimo gerencia di WEB den persona di Alfredo Koolman, hunto cu presidente di sindicato SIWA, Erick Henriquez, a firma e acuerdo colectivo di trabao nobo pa empleadonan di WEB Aruba.
Mediante un comunicado di prensa WEB a splica cu e CAO nobo ta valido pa 5 aña, unda director Koolman ta satisfecho cu e hecho aki. Esaki ta algo hopi constructivo, pa motibo cu e ta aporta na pas laboral y un miho bista di gasto di personal pa un periodo di 5 aña.
Firmamento di e CAO a tuma luga dia 21 di december ultimo den presencia di e team negociador cu a consisti di miembronan di e sindicato y miembronan di gerencia di WEB, cu sosten di conseheronan tanto di parti di sindicato como di parti di gerencia.
E negociacionnan a tuma un tempo di 6 siman y a bay semper den un bon ambiente, prome cu e negociacionnan a cuminsa tabatin diferente sesionnan riba diferente topico unda a yega na un acuerdo dia 7 di december ultimo, cual a ser aproba pa un mayoria di miembro di SIWA dia 8 di december ultimo.
