dividend web (1).jpg

Riba di uzo di dividend di nan ganashi pa duna   gobierno, director di WEB, Luis Oduber a bisa cu nan ta wardado riba un maneho di dividend. Sinembargo nan lo percura cu esaki lo no bay na gobierno completo.

 

E ta bisa cu di aña 2012 tin 3 miyon pendiente y na 2015 nan a paga 5 miyon florin di dividend na gobierno. Pero tabatin añanan cu esaki no tabata factibel. El a bisa cu tabatin diferente añanan manera 2013 y 2014 cu tabata añanan cu WEB a core cu perdida , y no tabatin espacio pa duna dividend. Aunke prome cu esey tabatin palabracion pa paga dividend na gobierno.

 

Actualmente director di WEB a declara cu e situacion financiero di e compania di utilidad aki ta bastante sano. Despues cu nan a pasa den un crisis financiero, actualmente  WEB ta produciendo ganashi entre 40 pa 50 miyon. Te hasta nan ta evaluando pa bin cu un reduccion di nan tarifa pa  nos comunidad.

 

Aworaki nan ta tratando pa hiba un maneho riba dividend pa nan tene cuenta di cuanto e cifra di dividend ta. Pero director di WEB a remarca cu ‘WEB ta keda un compania di gobierno y manera tur compania, e doño por pidi dividend’. Den nan caso –segun Sr. Oduber-  nan ta para semper pa gobierno no bay cu tur cos, pasobra WEB mester di placa pa sigui inverti den mantencion y mehoracion.

 

WEB y sponsor

Di otro banda Sr. Oduber ta laga sa cu ‘absolutamente no ta berdad’, nan no ta pagando gastonan cu gobierno ta haci den  inversionnan  of actividadnan cu no tin di haber directamente cu WEB.

E ta laga sa cu actividad manera Geen Conference nan ta sponsor cu un suma masha limita, y cu no ta debilita e compania financieramente.

 

Sr. Oduber ta bisa cu nan ta sinti e compromiso pa sponsor actividad manera Green Conference, ya cu como un compania estatal di Aruba nan mester por yuda riba educacion, deporte y instancianan caritativo.

 

E tambe ta declara cu WEB si ta participa den Green Conference pasobra nan ta e compania di energia na Aruba. “E ta un caminda unda nos por expone locual nos ta logrando y tambe nos ta siña di e otro partnernan internacional.”

Tambe den e pakete financiero cu nan ta dispone pa e evento aki, gran cantidad di nan empleadonan ta beneficia di e tipo di conferencia aki.