Ayera mainta den presencia di e team di manager, director di WEB, Sr. Luis Oduber a wordo bombardia cu pregunta relaciona cu e situacion di e planta mes. Esaki debi na e acusacion serio cu sindicato SIWA a lansa siman pasa, caminda nan a laga sa cu WEB ta den un decadencia total, y cu e prioridad ta poni robes. Pero tambe na cierto incidentenan cu a yega di sosode den WEB, y cu prensa a informa riba nan.
Incidentenan
Oduber a bisa cu tabatin un par di caso cu coriente a bay caminda e problema a inicia na WEB mes. Pero den nan investigacion a keda mustra cu e causa di esaki no tin nada di haber cu e calidad of condicion di nan ekipo. El a referi cu un di nan a sosode durante un test cu nan a haci cu e molinanan, caminda di repenti e planta a cay cu 30 megawatt cu tabata e blackout grandi. El a aclaria na comunidad cu no tin peliger pa blackout. Director general di WEB a informa cu e planta mes tin su proteccion di siguridad cu si na momento cu algo no ta bon e planta mes ta shut down.
Pa loke ta trata e situacion di e planta mes, gerencia di WEB ta considera cu bienestar y siguridad di tur empleado ta algo primordial. Sr. Oduber a informa cu pa algun siman caba gerencia tin atencion riba e situacion di nan planta y gran parti ta regarda e infrastructura. Nan a traha un lista di tur lo cual mester drecha of cambia. El a bisa cu e lista grandi di loke mester wordo coregi no ta representa un peliger pa e trahado. Tampoco e ta un peliger pa suministro di awa y produccion di coriente.
Pero mester tene cuenta cu nan tin mashin cu ta draai na un velocidad halto, temperatura halto y presion halto, caminda “nos no ta bay corta skina djis pa e planta lanta na tempo of pone bida of ekipo na peliger. E motornan ta traha oranan largo y por ta lekmento por surgi y tambe cierto problema, pero nan ta wordo plania y coregi.
Tin biaha nan no tin cierto piesanan, pero nan ta plania tur cos ya cu no ta a proposito cu operador of gerencia ta laga un planta core malo. Nan tin diferente team special dedica entre otro na e turbinanan y/of produccion di awa.
Tambe el a referi na e contaminacion di lama rond di WEB cu a ocasiona tambe cu hopi pisca a muri. Sr. Oduber a bisa cu e rapport cu a wordo traha ta mustra cu esaki no tabatin di haber cu e planta mes. E causa tabata debi na un tanki di fuel oil cu nan tin pafo di e planta den e cura di e compania. E ta un situacion poco comun caminda den ora di madruga un lek a registra den e tanki y su contenido a bay te lama ocasionando e daño ambiental aki. “Pero mainta ora cu el a wordo detecta, naturalmente cu tur e piscanan morto, y accion a wordo tuma pa preveni ripiticion”, el a bisa.
Inversion
El a declara cu actualmente nan tin limitacion cu personal. Sinembargo e departamentonan di Operacion y Mantencion hunto a pone ordo di prioridad pa haci e trabounan necesario, y cu e tipo di trabou aki ta tumando luga caba.
Tambe el a laga sa cu un suma di 38 miyon florin ta wordo destina anualmente pa realisa trabou di mantencion y inversion. Nan tin 11 motor y nan ta rekeri inversion grandi riba mantencion a base di un plan di mantenemento. P’esey director general di WEB ta haya hopi lamentabel cu SIWA ta lantando panico cerca coleganan y den comunidad.
