Gerencia di WEB no ta comprende e accion cu sindicato SIWA tabatin diabierna mainta. Tampoco e acusacion cu e lider sindical, Sr. Eric Henriquez a lansa den prensa den direccion di gerencia di e compania di utilidad aki, caminda el a yama nan como “arogante”.
Director general di WEB, Luis Oduber a laga sa cu berdaderamente e no sa kico ta tabata tras di e accion di SIWA, ya cu e ta mir’e como un cantidad di insinuacion sin base. E no kier bay den speculacion si e accion di SIWA tabatin un agenda scondi, ya cu como un persona hopi tecnico e ta gusta traha cu realidad. E no ta descarta cu eventualmente esaki tin di haber cu e proceso di negociacion di un CAO nobo cu nan ta bay drenta den dje.
El a splica cu inicialmente SIWA a wordo bisa cu tabata un reunion informativo pa pidi su miembronan sosten pa nan participacion den e manifestacion contra criminalidad diahuebs awor. Pero di repenti e reunion aki a bira un manifestacion contra gerencia y Minister di Utilidad, pa haya atencion for di e mandatario. Pues e no sa cual tabata e motibo real tras di e accion realisa pa presidente di SIWA, ya cu nan tabata declaracion confuso pa gerencia di WEB.
Arogancia y malinterpretacion
Un palabra cu a cay pisa cerca gerencia ta esun di arogancia. Sr. Oduber a laga sa cu e palabra aki tin hopi significado… y e no sa pa ki motibo e sindicato ta pensa asina. E ta reconoce cu actualmente nan ta negociando un contracto colectivo nobo (CAO), y ta logico cu nan lo por tin diferencia interno riba diferente postura, y e ta lamenta cu nan ta saliendo afo.
Tambe el a bay riba otro expresion cu lider di SIWA a haci cu e no ta compronde y cu e ta pidi un splicacion. Oduber a referi cu presidente di SIWA a menciona cu ta “bay drenta momentonan poco fastioso” y cu miembronan di SIWA lo no ta informa y tambe rabia. E no sa pakico SIWA ta pensa asina y di unda e preocupacion aki ta bini.
El a laga sa cu gerencia di WEB ta reuni cu SIWA cu e palabracion cu tur dos partido tin cu avisa adelanta ki topico of tema nan ta desea di dialoga riba dje. Riba un comunicado cu WEB a duna prensa a remarca cu 22 di september ultimo, tawata e prome biaha cu SIWA a manda su puntonan di agenda di antemano, mientras cu di banda di gerencia di WEB si nan ta cumpliendo cu e palabracion aki. P’esey nan a urgi pa SIWA haci mescos, ya cu e lo conduci na menos malinterpretacion y sintimento di arogancia cu SIWA mes ta sinti for di gerencia di WEB.
Nombramento di CFO nobo
Otro punto cu Sr. Oduber a trece dilanti tin di haber cu e nombramento di un CFO nobo cu ta un decision di Utilities. El a indica cu esaki no ta nada nobo, ya cu tur empleado y SIWA mes tabata na altura di e CFO nobo cu lo drenta na servicio entrante luna di october.
Sr. Oduber a splica cu pa basta tempo nan tabata wardado e CFO nobo aki, ya cu actualmente gerencia di WEB tabata consistiendo di su persona so como CEO di e compania di WEB, y bou di dje tin e team di e manager encarga cu cada sector.
El a reacciona bisando cu SIWA ta menciona cu ta “hala bloki di hende”, sin cu e empleadonan mes ta na altura. Sinembargo –segun Sr. Oduber- practicamente nada ta cambia, sino cu e gerencia di WEB lo ta responsabilidad di un hefe encarga cu operacion y otro hefe encarga cu financia. Kiermen un CFO y un COO, caminda e COO a wordo apunta pa ta e CEO tambe.
Mientras cu e team di sector managers cu ta cinco lo keda intacto. Tambe lo keda intacto tur e departamentonan cu ta resorta bou di cada Manager. “Den planta y den operacion practicamente niun hende ta wordo movi. E maneho ta keda riba e mesun team di maneho encabesa pa e CFO y mi persona”, el a bisa.
Unabes cu e CFO drenta servicio y si situacion ta rekeri algun cambio den linea di responsabilidad, lo cumpli debidamente cu e stipulacion di CAO tocante ‘Overleg’. Sr. Oduber a reitera cu e informacion aki a wordo ripiti durante reunionnan cu SIWA, reunionnan general cu empleadonan, pero tambe di departamentonan y pa medio di participacion por escrito.
