Ayera tardi trahadonan di Kooyman afilia na sindicato FTA a dicidi di manifesta nan disgusto den forma di un accion.
Sindicalista di FTA, sr. Rudy Geerman a declara cu nan tin basta tempo cu ta negosha un contracto colectivo (CAO) caba y nan a dicidi di bay den accion, mirando e diferencia cu tin entre FTA cu gerencia di Kooyman.
“Nos ta kere cu nos por yega na un solucion awe”, el a bisa. FTA a manda su ultimo proposicion dialuna ultimo caminda e sindicato ta propone pa ambos parti lo por ta mas cerca di otro. E sindicalista a laga sa cu e diferencia entre loke nan ta pidi y locual gerencia ta duna no ta demasiado grandi.
Solamente cu gerencia ta bisa cu nan tin un sistema di evaluacion y nan evaluacion ta duna un promedio di 2.5% di aumento. Pero sindicato FTA ta di opinion cu e promedio aki no ta conta pa tur hende. “Consecuentemente nos a bisa cu banda di e sistema di evaluacion nos lo kier tambe un aumento garantisa”, sindicalista Geerman a bisa.
El a laga sa cu gerencia di Kooyman no kier honra e solicitud aki di nan trahadonan. El a bisa cu gerencia di Kooyman a laga nan sa cu nan ta dispuesto pa cambia e sistema di evaluacion, pero nan no kier garantisa un aumento structural.
Esaki ta e echo cu a conduci cu na momento cu FTA kier a reuni cu e trahadonan ayera tardi, caminda e sindicato a bisa nan cu locual nan ta pidi gerencia no kier duna, esaki a conduci cu e trahadonan a manifesta nan mal contento.
Sindicalista di FTA a bisa cu nan lo keda para pafo di e negoshi te ora cu nan ta wordo yama pa e gerencia di Kooyman pa sinta negosha. Si nan no ta dispuesto pa sigui negosha, FTA a anuncia caba cu awe mainta nan lo ta para bek dilanti di e negoshi pa asina busca un solucion cu gerencia na mesa.
