Un persona cu ta entrepreneur tin e capacidad di realisa un esfuerso adicional pa logra un meta. Den actualidad esey ta referi na un persona cu kier cuminsa su mesun negoshi of proyecto.

Awendia, hopi profesional ta dicidi cuminsa nan mesun proyecto, cu e fin di logra un stabilidad economico y libertad laboral. Algun gobierno of entidad economico a propone pa yuda e hendenan aki, cu e intencion di duna un impulso na economia di e pais.

Durante un entrevista cu Bon Dia Aruba a haci cu Geraldine Bardowille, Jr. Bedrijfsadviseur na un compania di servicionan financiero na Aruba yama Qredits, el a duna di conoce cu e proximo 27 di augustus, e compania lo bay ofrece pa comunidad di comerciantenan na Camara di Comercio di Aruba (KvK) Pop-Up Office, informacion tocante con hende por cuminsa of expande nan negoshi.

E dia ey, hende por haya recomendacion y di mesun manera lo por aplica pa haya prestamo pa por expande of cuminsa nan negoshi, e balor cu cada persona lo por haya ta te 100.000 florin.

Bardowille a splica cu desde cu nan a cuminsa dedica na e area di bedrijfsadviseur na 2017, nan tin aproximadamente 135 cliente cu a haya nan prestamo pa inicia of expande nan proyecto of negoshi.

Ademas, el a informa cu na Aruba ta existi personanan cu den comienso tabata crea negoshinan nobo cu a aplica, pero na e momentonan aki tambe tin esunnan cu lo kier renoba of haya mas impulso cu nan producto.

Bardowille a bisa cu e ta uza tres pilar pa e servicio di prestamo. E prome ta e parti di financiamento, di dos ta e parti di educacion cu e-Learning, cu ta encera un programa pa guia e comerciante paso pa paso con nan por completa nan mesun plan di negoshi y plan financiero. El a destaca cu hopi di e comerciantenan nunca nan a traha un ‘Business Plan’ of un ‘Financial Plan’. Di tres parti ta coaching, cu ta trata ora cu e comerciantenan haya financiamento tambe nan ta haya un coach, kende lo duna e sosten necesario den marketing, benta, financia, tax, etc.

“Esey ta e area cu nos ta sinti cu nos ta sostene nan y motiva nan pa nan sigui bay dilanti” Bardowille a bisa.

Asina mes, el a comenta cu nan ta ofrece ‘Eigen Baas Programa’ cu ta dedica pa educa studiantenan riba tur cos cu ta encera con nan por cuminsa y maneha nan mesun negoshi den futuro. A cuminsa esey na EPI y tambe nan a presenta na Universidad di Aruba y igualmente nan ta bay forma parti di ‘Entrepreneur School Program’.

Ademas el a expresa cu e ta mira cu na Aruba e parti di cuminsamento di un negoshi ta un proceso hopi largo, pa motibo cu nan tin cu habri cuenta na banco, e parti di permiso cu ta tarda y eynan nan ta keda pega. “E trayecto ey por ta mas cortico den otro instancianan y asina hende por sinti mas confortabel pa lanta nan negoshi y no tarda hopi”, Bardowille a sigura.

Pa finalisa, Bardowille a expresa cu semper ta importante pa e personanan por informa nan mes, nan por acerca te un bedrijfsadviseur of na KvK pa haya un bista completo di kico ta necesario ora un persona ta skirbi nan plan di negoshi, kico ta e puntonan tin cu wak aden, kico ta haci nan producto of servicio diferente compara cu tur e competencia.

Den hopi caso, e situacionnan economico di e pais ta dificulta e acceso pa trabou den relacion di dependencia. Den e casonan ey, esunnan cu tin un espiritu entrepreneur lo por traha pa nan cuenta y crea nan mesun negoshi. Esey ta un decision dificil y e persona mester sa e risico cu ta tuma y cu na e momentonan ey ta renuncia di e stabilidad di un salario.