Sindicato TOPA a indica cu nan a ricibi un documento cu ta informa e renobacion di Centro Deportivo Betico Croes y pa haci esaki den un shelter. President di Aruba Sport Unie (ASU, Sr. Gerald Franca, a indica cu e centro deportivo no lo bira un shelter y e no sa unda a bin cu esaki. Centro Deportivo Betico Croes lo bira un shelter ora di un calamidad, pero cu e ta bay wordo renoba pa bira shelter esaki no ta asina. IBiSA, scolnan ta haci uzo di e centro deportivo.
Sr. Franca a bisa Bon Dia Aruba cu e centro deportivo por bira un shelter ora cu presenta un caso di emergencia presenta. Aki e ta referi cu ora di calamidad y si algo pasa cu hende perde nan cas, e ora nan por keda drumi na Centro Deportivo Betico Croes. “Por ehempel pa un horcan of otro motibo, e luganan aki ta traha cu bo por uza nan como un shelter,” el a sigui bisa Bon Dia Aruba.
Den caso di emergencia
Centro Deportivo di Santa Cruz no ta e unico luga cu ta bira un shelter ora di un caso di emergencia. Centro Deportivo Frans Figaroa, Stadion na Dakota, YMCA, Sporthall na Colegio Arubano tur ta traha pa bira un shelter ora cu mester. E luganan aki ta facilidadnan cu tin acceso na cantidad di baño, tin luga special pa hendenan cu tin rolstoel, tin w.c. pa nan. “No cu nos ta shelter, pero nos no ta bay bira shelter. Den caso cu emergencia presenta, e centro deportivo lo bira un shelter,” president di ASU a sigui bisa Bon Dia Aruba. En caso cu Centro Deportivo Betico Croes mester bira den un shelter, mas o menos 35 pa 40 persona por keda drumi eyden. “Si un horcan pasa, e luganan aki por wordo uza. Cruz Cora tin e capacidad pa ta un shelter. Nos tin akinan 16 baño pa hende por baña. Nos tin e cantidad di w.c. pa hende por uza. Tin espacio pa e cushina, pero e cos ta cu mester di e cambernan pa hende por drumi,” el a sigui splica.
No lo bira shelter
Sindicato TOPA ta papia di tin un documento den nan man cu lo renoba e centro deportivo di Santa Cruz pa haci esaki un facilidad di shelter, Sr. Franca un biaha mas a bisa cu esaki no ta asina. E pregunta cu ta bin dilanti ta di unda e documento aki a sali. E centro deportivo di Santa Cruz no por bira un shelter, pa motibo cu e luna aki mes lo tin un campeonato internacional di badminton y na luna di november lo tin campeonato di volleyball.
