Bon Dia Aruba a papia cu Geomar Nadall, kende ta splica tocante cambio cu el a tuma den su bida pa un bida saludabel pa su curpa, y mentalmente pa por maneha e mundo druk di awendia.

Geomar Nadall ta bayendo pa varios aña comiendo vegan. Un cambio cu el dicidi pa haci despues di mira un video cu yama ‘Earthlings’, cu a habri su wowo na e maltrato cu tin pa naturalesa y ser bibo na mundo.

Den un periodo di 8 luna el a haci e transicion pa bira vegan. Un persona vegan no ta come nada di cu ta sali di bestia of wordo traha di bestia. Un ehempel manera keshi of webo of material cu ta sali di bestia.

E maltrato di con ta inyecta un bestia of mata nan di un manera cruel el a dicidi di no come mas bestia. Basa riba un plan di dieta di planta y fruta. A puntra Nadall con su curpa ta sinti despues cu el a haci e cambio. E prome cos cu el a sinti tabata ‘menos hincha’.

Segun Nadall ta splica nunca e tabata un persona gordo, e ta splica, pero e tabata bebe proteina y algun cos den su curpa cu tabata lag’e sinti ‘bloated’, manera yen. Tambe ta remarca cu e proceso a yud’e mentalmente.

“Dia cu mi a cuminsa hinca fruta den mi curpa, mi mente a cambia completo. Mi por enfoca miho, mi por corda miho, mi tin demasiado energia, hopi concentracion y mi mente ta cla”, el expresa.

Sinembargo Nadall ta bisa nos cu awendia hende ta biba den un sistema cu tur cos ta ‘pura’ anto persona ta enfoca riba tur cos rond di nan, menos pa nan mes. “Pura pa yega tal ora, haci lihe pa trabou, trafico lihe”, y pa es motibo ta come menos saludabel.

Un bida manera e ta bisa ‘hectic’ (druk), anto e esey ta stroba hende di realisa kico ta hinca den su curpa ora di come. “Nunca nos ta pensa esey” pa motibo cu mentalidad di persona ta hinca otro caminda, manera rednan social of otro interes di bida.

Aunke Nadall ta compronde cu un bida cu ta ‘plant based’ por ta caro na Aruba, pero e ta conseha pa hende purba. “Rond di Aruba tin luga cu hopi fruta, anto hende por coy tanten no ta paden cura di hende.”

Anto purba di cumpra esunnan cu ta menos costoso, y lo nota cu ‘fruta ta trece cambio den bo bida’. Tambe su cambio den manera di come. E ta remarca cu cada hende tin cu tende locual nan curpa ta bisa.

A puntra Nadall cu awendia tin dokter cu ta bisa cu persona mester di carni den nan curpa. E ta contesta cu pakico mester come carni, si un e curpa di ser humano ta produci vitamina, mineral, aminoacid y mucho mas.

“Di unda e bestia ta haya tur su vitamina, mineral? Pakico nos tin cu come carni, si e mes bestia ta hay’e di mata. Dicon nos mes no ta bay directo na e mata? Pakico nan lo recomenda esey? Pasobra e ta un custumber di e programa. E sistema cu ta den dje cu e ta bon pa bo, anto no ta asina.”

Pa un persona por ta dificil pa laga atras cuminda cu semper a custuma di come henter nan bida. Pues e ta conseha manera e mes a stop cu carni, el a sigui cu galiña,un tempo despues el a stop despues pisca,te ora cu el a stop completamente.

Un persona mester por sa kico pa come si, pasobra e ta agrega cu batata y hopi aros, cu no tin nada cu bestia pero ta come den exceso, tambe ta haci daño. “Ta bon pa semper tin un balans.”

Den pasado Nadall tabata un bodyboilder anto e no tabata sa con pa come. Un fase den su bida ‘mi a crece di etapa ey’. Actualmente e lo kier conseha pa hende cambia nan estilo di bida. “Si nan stima nan mes y kier pensa miho, pero ta algo cu cada persona tin cu kier. Pa un miho enfoke mental y claridad.”