Manera a ser informa dia 7 di october ultimo despues di rumornan, partido Raiz a informa tocante e retiro di Geoffrey Wever for di nan organisacion caminda diasabra ultimo mediante un conferencia di prensa e partido FUTURO present’e como lider y candidato nobo riba nan lista caminda pa eleccion 2024.

Den un declaracion, Gerlien Croes di partido FUTURO a anuncia un “asociacion historico” caminda el a splica cu e union di Wever na e partido ta e vision y pensamento cu nan a yega na dje y nan ta comparti ta cu “awe nos por bisa oficialmente cu Aruba cu conhuntamente nos ta carga y nos lo lidera di un forma dual e partido FUTURO,” el a bisa.

Na mesun tempo el a bisa cu diasabra ultimo den un asamblea general di partido nan a pidi aprobacion di nan miembronan, no solamente nan no a apunta huridicamente Croes como lider di partido pero tambe nan a propone cu politicamente dos persona lo carga e partido aki y oficialmente esey a keda aproba.

“Awe nos ta anuncia na pais Aruba cu FUTURO tin dos lider pa carga e organisacion pero tambe pa lidera e pensamento y e vision cu pa un proximo eleccion Aruba lo por coresponde na anhelo di e pueblo aki cu pa hopi aña ta pidi pa un alternativa real y tambe pa tin un tipo di politica na Aruba cu ta profesional di contenido y a base di esaki awe nos a yega na un acuerdo,” Croes a sigura.

Croes, cu su experiencia den parlamento, ta continua como lider oficial y legal di FUTURO, mientras cu Wever lo aporta na e liderazgo politico y ehecucion di e vision di partido for di e experiencia obteni den e ambito gubernamental. Hunto, lo guia e partido cu un vision comparti cu tin como obhetivo representa e interes di tur Arubiano y traha na bienestar di e isla, basa riba e idealnan di Bon Gobernacion, Transparencia, Unidad y Representacion.

Di su parti, Wever a splica cu hunto nan lo uni pa por cumpli cu e retonan di pais Aruba tin su dilanti, tres aña y mey el a drenta den politica cu e pensamento y vision pa “trece un cambio den politica y mi a hiba e politica na mi forma y bo ta wak cu den union aki dos politico ta reconoce e forma di hiba politica, e forma di respet basa riba contenido. Gerlien hibando un debate hopi fuerte den parlamento riba contenido y a mi haciendo mi trabou como minister pero semper purba di keda obhetivo sin ataca ni un persona cu e meta di hiba Aruba pa dilanti,” el a bisa.

El a trece dilanti cu tabatin combersacionnan y reunionnan pa asina ey yega na e union aki cu diasabra ultimo nan a anuncia na comunidad di Aruba “ofreciendo tambe un alternativa pa eleccion 2024, cu un politica diferente, cu retonan importante nos dilanti y solamente ora bo ta enfrenta e retonan aki di un forma profesional basa riba cifra y conseho, ta e manera con bo por tuma decisionnan corecto cu ta hiba Aruba den un direccion cu ta merece di bay.”

Wever a sigura cu e ta spera cu comunidad lo compronde cu pa yega na e decision di retira for di un partido unda el a keda como minister den eleccion anterior, “no ta un decision facil e ta un decision cu ta tuma hopi tempo, di reflexion propio. Tres aña den gobernacion por refleha cu esey ta tuma tempo y den e escenario cu gobierno a bira demisionario, e decision tabata mas dificil.

Diabierna ultimo den conferencia di prensa di prome minister Evelyn Wever-Croes e mandatario a elabora riba e posicion di minister demisionario di Asunto Economico, Sostenibilidad y Comunicacion, Geoffrey Wever, despues cu el a anuncia su retiro di partido Raiz.

Riba e pregunta di prensa kico ta e status di minister Geoffrey Wever, ken recientemente a retira for di partido di coalicion Raiz, prome minister a expresa cu “honestamente nos a wak su esey ta bin, e no tabata un hende cu tabata mucho contento cu e parlamentarionan di Raiz den kibra nan mes den palabracionnan cu nos a haci y bo tabata weita n’e e momento eynan cu e no tabata mucho contento.”

Partijraad di Raiz a pidi Wever pa e keda como minister y esey ta un carta cu prome minister a haya recientemente manera el a sigura, “mi mester un declaracion por escrito di e dos parlamentario, Misha Raymond y Raymon Kanperveen cu nan ta sostene Geoffrey Wever como minister pa Raiz, mas cu e no ta parti di Raiz mas.”

Asina mes, el a enfatisa cu e mester haci un distincion den esaki pero cu mester enfoca riba ley, kico ta legalmente e situacion y legalmente e situacion ta cu si tin un hende cu ta minister y e tin sosten di e mayoria den parlamento, e por keda minister.

P’esey tabata importante pa sa di e dos parlamentario di Raiz ta sostene Wever pa Raiz y e ora ey e ta keda como minister.