Despues di basta rumor y hasta declaracion algun dia atras di e mesun partido, bisando cu e noticia no tabata berdad, finalmente ayera partido Raiz a confirma e salida di minister Geoffrey Wever for di partido Raiz.
Mediante un comunicado publica riba rednan social, e partido a anuncia salida di minister Wever:
“Plataforma Raiz ta desea di informa su miembronan, simpatisantenan y publico en general cu miembro di partido, Geoffrey Wever a tuma e decision pa retira di e plataforma. Geoffrey Wever ta un profesional y tabata un miembro importante di nos ekipo, trahando incansablemente riba nos vision comparti den areanan di economia, desaroyo sostenibel y agricultura innovativo. Su decision ta uno propio y a wordo tuma a base di un bista diferente di con e como persona ta desea di sigui traha ariba, pa nos pais, y con politica mester wordo hiba. Raiz ta un Plataforma cu por wordo mira como un incubator unda cu ta fomenta ideanan nobo, innovacion, y desaroyo personal y profesional. Raiz su portanan ta habri pa profesionalnan cu tin vision y gana di cambia nos pais pa miho. Miembronan lo bin y miembronan lo bay haciendo nos plataforma cada bes mas fuerte. Durante RAIZ su periodo den gobernacion, nos a mustra a base di ehempel con Gobierno por traha a base di cooperacion y colaboracion, sin distincion di colornan politico. Ningun hende ta indispensabel y semper mester tin espacio na tur esnan cu kier yuda genera cambio y promove ideanan nobo, sea cu nan ta simpatisante di Raiz of no.”
Ademas, e partido ta sigura cu nan vision pa politica na Aruba ta pa progreso y cambio sin discriminacion politico. “Nos a bin pa traha riba cambio berdadero cu lo permanentemente marca nos cultura politico. Esaki ta permanece nos compromiso y esaki nos lo logra. Raiz ta desea Geoffrey tur clase di exito cu su siguiente proyectonan y ta gradici’e pa e tempo y energia cu e la dedica na nos causa y pa Aruba. E forza di Raiz ta su team, cu no ta depende riba un of algun individuo, pero ta un colectivo di miembronan cu e meta comun pa trece cambio structural den politica na Aruba,” a señala.
Bon Dia Aruba a tuma contacto cu minister Wever pa asina por trece dilanti un poco mas di informacion tocante su retiro, mirando cu e comunicado ta di e partido mes, pero te na ciere di edicion aki e mandatario a keda sin duna un contesta.
Despues cu algun medio di comunicacion local a circula e rumor cu actual minister demisionario di Asunto Economico, Comunicacion y Desaroyo Sostenible, Geoffrey Wever lo tabata bandonando e partido pa uni cu Gerlien Croes den e partido nobo Futuro, partido Raiz mes a bin dilanti cu un “fact check” pa desmenti esaki dia 16 di september.
Ta parce cu e rumornan a cuminsa pa motibo di un potret cu Gerlien Croes, kende 15 di september ultimo a lansa su partido nobo, Futuro, a post riba rednan social despues di apertura di Aña Parlamentario. Riba e potret por a mira Croes cu Wever, acompaña pa un frase celebrando nan amistad y relacion como colega den ambito politico di Aruba. Esaki a pone cu algun medio di comunicacion local a circula e rumor cu Wever lo bandona Raiz pa uni Futuro, lo cual awe por confirma cu tabata berdad.
