‘COP26 a brinda oportunidad pa haya informacion valioso con por yega na fondonan internacional’

“Un biahe di cinco dia, unda casi no a drumi y a pasa mas tempo ta conoce y traha lazonan, no ta un snoepreisje,” tabata e reaccion di Minister di Economia y Desaroyo Sostenibel Geoffrey Wever na Bon Dia Aruba. Mr. Wever a reacciona riba e articulo y comentario di medio ambientalista Milton Ponson, kende a cuestiona e biahe di mr. Wever pa Escocia, unda el a atende e conferencia di Nacionnan Uni riba cambio di clima, esta COP26.

“E biahe tabata un hopi pisa y no tabatin nada di relahacion y ‘fun’, pasobra tabata reunionnan tras di otro. E tabata un biahe na interes di traha relacion, cu ta hopi importante pa Minister di Economia.”

Minister Wever a bolbe Aruba Diahuebs anochi y ya ayera a atende Conseho di Minister. Y a papia tambe cu Bon Dia Aruba riba e importancia di e biahe. Netamente pasobra Aruba ta den un posicion vulnerable, mescos cu tur otro pais chikito, conoci como SIDS, esta Small Island Development States.

“Mi a cera conoci cu hopi persona clave, incluso di Secretarionan di Estado (di Hulanda), Directornan General di diferente departamento relevante na Hulanda y crea lasonan pa mira con pa traha hunto.”

Los di e landspakket cu ta mara Aruba na proyectonan y reformanan specifico, por a intercambia pensamento riba kico otro por traha riba den hunto cu Hulanda na beneficio di Aruba. “Ta cuestion di informacion y proyectonan specifico y un encuentro asina ta crea base pa Aruba haya beneficio di dje a plazo largo.” Sr. Wever a bisa cu como Minister nobo, e ta yud’e den su tarea pa crea oportunidadnan economico nobo na Aruba.

Tratado di Paris

Pa loke ta e critica di Sr. Ponson, mr. Wever a admiti cu Aruba ainda no a ratifica e Acuerdo di Paris. Pero e idea ta pa e sucede den futuro, pasobra tin interes. Pero e obligacionnan internacional basa riba e acuerdo aki muy probablemente ta conta pa Aruba toch. “Mi ta bisa muy probablemente pasobra e ta un ehercicio huridico basta complica cu no por ilustra facilmente. Pero tur cos ta mustra cu e obligacionnan di e acuerdo ta conta pa Aruba tambe. Tin veredicto na Hulanda, por ehempel den e caso Urgenda, unda e fundacion Urgenda a demanda estado Hulandes pa reduci su emision di CO2 cu 25 porciento. Corte Supremo, Hoge Raad a duna e fundacion razon na 2019. “E veredicto den e caso aki ta basa riba articulonan di e Tratado Europeo di Derecho Humano cu tambe ta aplicabel pa nos. Tin un sentencia riba e refineria na Corsou cu ta basa riba e mesun forma di pensa di Hoge Raad, cu e tratadonan internacional den mente. Pues nos no por bisa cu pasobra nos no ta participe na e tratado di Paris, e reglanan internacional no ta conta. Pues eynan, Sr. Ponson no tin razon,” e Minister, un hurista a enfatisa. “Nos ta mara na cierto obligacion pa reduci e emision di CO2.”

SIDS

Y los di e tratadonan, realidad ta cu Aruba hunto cu otro SIDS lo ta e promenan cu realmente ta bay sinti e efecto di cambio di clima. Como tal mester uni cu otro SIDS pa e stem di Aruba tambe por resona rond mundo. “E paisnan cu ta susha, e paisnan grandi, nan mes no ta haya e impacto mescos cu nos. Pero nos cu no ta contribui na e daño, ta e promenan pa sinti e efecto. Pues mi ta kere cu e ta importante pa nos tuma e topico aki na serio y nos cera aliansa cu otro SIDS.”

Reino Hulandes y fondonan

Un di e topico principal cu Wever a hiba na Escocia durante COP26 tabata e reto specifico di Aruba como parti autonomo di Reino Hulandes. Pasobra tin fondonan disponible pa SIDS. Sinembargo como parti di Reino, Aruba no tin acceso na esakinan. “M’a papia cu representantenan di fondonan, y nan tur a yega na e conclusion cu Aruba no tin acceso na e fondo di 100 biyon cu paisnan lo a pone hunto pa combati cambio di clima.” Mas ainda, e dificultad pa presenta un proyecto pa logra financiamento ta hopi dificil. “Si Aruba tin un proyecto climatologico cu ta costa 10 miyon, pero otro pais ta pidi pa un proyecto di 100 miyon, e trabao pa hinca e proyecto den otro, esta e papeleo ta mesun hopi. Y mayoria biaha ta scoge pa un proyecto grandi y nos ta keda afo.”

Wever a bisa cu el a trece e punto aki dilanti na conseheronan di Secretario General di Nacionnan Uni, pa mira con por organisa pa haya acceso na e fondonan aki. “Esakinan ta puntonan cu mi a trece cu mi pa traha di dje.”

Wever a ilustra cu el a haya oportunidad di papia cu Prins Jaime de Baorbon de Parme, yiu di Prinses Irene di Hulanda, kende ta e Enviado di Clima pa Hulanda, kende a admiti cu pa motibo cu Aruba ta cay den Reino, ta dificil pa yega na fondonan internacional. Su conseho na Wever tabata pa decifra tur e areglonan y trece claridad cerca organisacionnan internacional cu Aruba tin su propio presupuesto y cu “nos ta un pais independiente den Reino, y pa nan no ‘reken nos af’ pasobra nos ta cu un pais rico den Reino, pero cu nos no tin e mesun nivel cu nan.”

Entretanto Minister Wever a pidi Direccion pa Asuntonan Economico, Comercio y Industria, pa haci un analisis di tur fondo internacional y pa busca acceso na nan. E problema cu hopi ta señala ta cu den Gobierno no tin e capacidad di personal pa skirbi e proyectonan grandi aki. Ta documentonan cu ta rekeri hopi veracidad y experticio pa hinca den otro. “Nan ta rekeri experticio y no ta sin mas un hende por skirbi un documento pa por haya fondo pa un proyecto.”

Consecuentemente mester mira cua ta e fondonan cu ta disponible pa Aruba, y asina inverti den e personal pa busca e fondonan. “Si nos por haya acceso na 10 miyon florin afo, anto ta bal la pena pa inverti 100 a 200 mil na preparacion di personal.”

Caricom tin un oficina na Belize cu ta yuda e paisnan den Caribe traha riba ‘project dossiers’ pa asina busca acceso na fondonan. Durante COP26 a papia cu ehecutivonan di Caricom pa mira con nan lo por asisti Aruba tambe, pa medio di intercambio.

FDA

Wever ta kere cu e ta necesario pa Hulanda y Aruba wak e modelo di Fondo Desaroyo Aruba y con el a funciona y con el a crea experticio pa traha project dossier na Aruba mes y ehecuta proyectonan miyonario cu eficiencia y eficazmente. “FDA tabata exitoso y nos a traha asina bon cu otro. Y na final, tanto Hulanda y Aruba a evalua FDA positivamente. E placa di FDA a keda inverti den forma positivo. Berdad (AIB Bank) nan tin e experiencia, pero nan ta sector priva. Kizas e ta un manera pa intercambia conocemento y yuda nos cu training.”

Networking

E biahe tabata importante pa Minister Wever y el a bisa cu e ta tuma tur critica “pasobra lo mi sigui haci e tipo di biahenan aki. Mi no ta den e trabao aki pa mi biaha. Tempo di abogacia, mi tabata haci hopi di e biahenan aki. Tin biaha, despues di 10 cu no a produci nada, ta bay un siguiente cu ta trece asina un beneficio aden, cu e ta cubri pa tur e otronan. Ta asina ta crea lazo, asina ta haya conexion.”

Ehempel ta cu ya caba tin peticion di un Secretario di Estado di Hulanda pa manda hende di su despacho pa haci un intercambio na Aruba. “Nos ta demasiado chikito pa nos wak nos so. Ta gastonan relativamente chikito pa beneficionan grandi cu nos por haya. E ta networking cu ta importante,” ta su conclusion.