E herencia genetico di Neandertal den algun persona por aumenta nan riesgo di desaroya Covid-19 severo.

Un pida di DNA riba e cromosoma humano 3 a ser haya anteriormente di ta asocia cu un aumento di riesgo di desaroya malesa severo di infeccion di coronavirus y wordo hospitalisa. Algun herencia genetico pasa despues cu humano a reproduci cu Neandertal mas di 50mil aña pasa ta conoci pa afecta funcion inmuun y otro aspectonan di salud humano den temponan actual. Pues investigadonan a dicidi di mira si Neandertal y otro primonan lehano yama Denisovan tambe ta comparti e region riesgoso.

“Mi a cay for di mi stoel. Mi tabata hopi sorprendi pa mira cu e variantenan genetico tabata exactamente igual cu Neandertal”, segun geneticista evolucionario Hugo Zeberg di Max Planck Institute for Evolutionary Anthropology na Leipzig, Alemania, y e Karolinska Institute na Stockholm. Zeberg y su colega di Max Planck, Svante Paabo, a reporta e hallazgonan dia 30 di september den Nature.

Alrededor di mita di persona cu e ancestronan en cuestion ta bin di Sur Asia – particularmente Bangladesh – y alrededor di 16 porciento di hende na Europa awendia tin e herencia Neandertal aki, segun e estudio nobo.

E DNA peligroso a ser identifica como un zona di peliger pa Covid-19 den estudionan di asociacion den genoma, of GWAS, cu ta usa metodonan estadistico pa haya variantenan genetico cu ta aparece mas frecuentemente den hende cu un malesa particular cu den esunnan sin e malesa. Den e caso aki, e comparacion tabata entre hende cu tin formanan leve di Covid-19 y hende cu tabata rekeri hospitalisacion.

E porcion di cromosoma 3 aki ta contene variantenan genetico multiple cu ta casi semper hereda hunto, formando un bloki conoci como haplotipo. E variantenan ey no ta necesariamente e cambionan genetico cu ta conduci na malesa mas severo, pero nan ta adverti cu un of mas genes den e region por ta responsabel pa aumenta suceptibilidad pa coronavirus. E investigadonan ta trahando pa descubri cua genes den e region por ta contribuyendo na suceptibilidad, segun Zeberg.

Di 13 variante genetico cu ta compone e haplotipo di riesgo, 11 a ser haya den DNA di un Neandertal 50mil aña bieu den Cueba Vindija na Croacia, y tres tabata comparti cu dos Neandertal di montañanan Altai di Rusia. Denisovanan, di otro banda, no tabata carga e variantenan aki.

Maske mayoria di no-Africano tin algun tipo di DNA Neandertal como un relikia di reproduccion antiguo, herencia di e haplotipo suceptibel pa Covid-19 tabata aki aya. E haplotipo no a ser pasa na Asia Oriental, pero hende di herencia Sur Asiatico tabatin mas probabilidad di tin e legado Neandertal. Alrededor di 63 porciento di persona na Bangladesh tin sikiera un copia di e haplotipo asocia cu malesa, y 13 porciento tin dos copia (un di e mama y un di e tata). Pa nan, e DNA Neandertal por ta parcialmente responsabel pa aumento den mortalidad di infeccion di coronavirus. Hende di origen Bangladeshi bibando na Reino Uni, por ehemplo, tin dobel probabilidad di fayece di Covid-19 compara cu poblacion general.

E patronchi no stabiel di herencia aki por indica cu diferente presionnan evolucionario tabata den efecto durante e historia di e haplotipo, segun Tony Capra, un geneticista evolucionario na Universidad di California, San Francisco. “Ta un les importante tocante variacion genetico; loke ta bon den un luga por ta malo den otro luga.”

Na Bangladesh, e haplotipo en cuestion por a duna hende un bentaha evolucionario pa combati otro patogeno, manera colera, permitiendo e haplotipo aumenta den frecuencia, Zeberg ta specula. Na Asia Oriental, por tabata un desbentaha evolucionario pa cu otro malesanan, pa loke el a reduci.

E resultadonan no ta nifica cu tene DNA Neandertal lo causa hende un malesa severo – ni cu no tine ta protege hende. Asiaticonan Oriental generalmente tin mas DNA Neandertal cu otro gruponan, pero no a hereda e haplotipo particular aki. Sinembargo, miles di persona na China y otro partinan di Asia Oriental a fayece di Covid-19. Di otro banda, hende di descendencia Africano tin tiki of nada di DNA Neandertal, pero Mericanonan color scur ta entre esnan den mayor riesgo di muri di Covid-19, hopi biaha pa motibo cu por no tin relacion cu genetica.

Capra ta destaca: “Cu Covid-19, tin un componente genetico cu ta importante, pero factornan social y ambiental ta hopi mas importante pa determina riesgo y severidad.” Por ehemplo, un di e factornan di riesgo mas grandi ta edad, cu muchanan chikito den menos riesgo y hende di edad avansa den mayor riesgo di hospitalisacion of morto pa Covid-19.