Asociacion Trabou di Hubentud di Aruba (ATHA) a introduci nan proyecto di mas nobo cu ta yama GEN 297, un programa cu ta trata di haci actividadnan despues di scol.

Cindy Kelly Mathilda director di ATHA a expresa cu pa algun añanan caba nan a haci un preparacion pa asina nan por trece pa hobennan di scol secundario di Aruba un programa despues di scol, el a señala cu despues di un sondeo cu a tuma luga pa asina nan duna informacion riba lo cual ta e tratado di derecho di mucha na Aruba a bin e pregunta na e hobennan di e necesidad di un programa despues di scol.

Segun Kelly, e reaccion pa esaki tabata hopi positivo y for di eynan nan a cuminsa cu tur e preparacion, nan a sinta cu diferente organisacionnan cu ta traha cu area social y tambe educacion di un forma di cooperacion cu Cede Aruba caminda cu nan a hinca den otro e prome paso di loke ta trata e programa despues di scol.

E organisacionnan hunto pa crea mision y vision a traha den grupo den cual a crea un meta, ademas nan a trece nan puntonan dilanti pa e experiencianan cu nan tabatin cu diferente programanan den pasado, for di eynan Kelly a menciona cu nan a cuminsa traha duro pa e fondonan necesario pa por cubri un programa cu ta pa despues di scol.

Social Crisis Plan, Cede Aruba y Samewerkende Fondsen Cariben ta sostenedonan financiero di e proyecto aki GEN 297.

El a splica cu e programa aki ta trata cu ora e hobennan despues di scol por asisti na oranan di merdia na Centro di Bario di Brazil na unda e prome programa lo cuminsa tur dia di dialuna pa diabierna despues di sali for di scol, un bes cu nan ta yega nan tin e chens di conversa cu otro, come un cuminda cayente cu nan lo ricibi, entre otro actividadnan.

Pa por forma parti di e proyecto aki, nan ta pidi un contribucion di AWG 125 pa luna pero mirando cu mei a cuminsa caba nan ta pidi AWG 60 so, na luna di juni si lo mester paga e luna completo te cu april di otro aña, Kelly a declara cu esaki ta un proyecto piloto den cual nan ta buscando e miho manera pa por ofrece esaki pa e hobennan.

Segun Kelly a trece dilanti, e parti bunita di e proyecto ta cu nan a traha hunto cu un organisacion di Merca cu tin hopi aña di experiencia trahando cu un proyecto di e forma aki y eynan nan a duna diferente manera y experiencianan cu nan mes a pasa aden pa hinca un programa den otro.

E importancia ta e continuacion di e hoben mes como participante, caminda cu e hoben ta indica kico ta su necesidad pero tambe kico ta su deseonan pa loke ta un programa despues di scol.

For di aworaki te augustus, nan lo ta brindando e programa hunto cu organisacionnan cu nan ta traha hunto y entrante augustus nan lo cuminsa draai riba un programa cu e hobennan ta hinca den otro, por ehemplo, e hoben ta indica e deseo di sa kico ta beach tennis, nan ta mira ken mas tin e necesidad di esaki pa asina nan ta bay busca e posibilidad pa por trece esey den nan programa.

“Di e manera aki e hoben tambe ta sinti su mes como parti di e programa y ta sinti’e cu e tin un convenio tambe pa forma parti y sigui sostene otro hobennan den nan comunidad”, Kelly a sigura.

Como ATHA nan no por a laga afo e parti di stimulacion di trabou boluntario y nan ta traha cu un grupo di hoben cu a participa den diferente programa pa nan ta lider, como por ehemplo Poder di Hubentud y tambe hobennan ta Pitch Time di Cede Aruba caminda e hobennan aki lo yuda durante e programa pa duna e sosten como hoben guia.

Asina mes el a informa cu tambe nan ta conta cu un grupo di hende adulto cu lo t’ey pa duna e sosten y ademas e profesionalnan di diferente area cu ta wordo dirigi ma hobennan di scol secundario como SPO, EPB, MAVO, HAVO, y VVO

Franchesca Heinze manager di e proyecto GEN 297, a specifica cu despues cu e hobennan ta ricibi su cuminda nan lo haya momento pa haci nan tarea di scol y despues di esey nan por scoge diferente actividad cu ta deporte y musica, e programa y su actividadnan ta core bou un tema pa tres luna, segun el a indica, e idea ta pa tur actividad ta conecta cu otro.

Timothy Lake lider di grupo di GEN 297 a invita tur e hoben pa uni na e programa aki y tambe encurasha e mayornan, cu segun el a afirma lo tin un impacto grandi riba e hobennan y na e momentonan aki cu mas Aruba mester di dje dirigi pa hobennan cu un programa sano na unda nan por keda riba e bon caminda.

Tambe a bisa cu nan tin un plan strategico traha pa cinco aña caminda cu nan tin pensa expande esaki na tur bario, aworaki nan lo wordo ubica na Brazil y e reaccion pa cu esaki tabata hopi positivo manera a expresa y na unda nan a haya preguntanan si e proyecto aki por cuminsa na scolnan mes pero esaki no ta den nan plan te ainda.

“Nos tin e fondo pa un aña na unda nos ta ofrece esaki akinan y e ora ey nos ta bay wak kico mas ta bin y kico mas ta sali di e proyecto”, Kelly a sigura.

E programa aki ta financia p 60 hoben na Centro di Bario di Brazil y na momento cu nan lo papia di expande esey e ora ey tin cu sinta un biaha mas pa wak si tin e fondonan pa por cubri.

Muchanan no mester zorg pa bay cu ningun instrumento ni algun otro material, pa motibo cu esey ta inclui den e AGW 125 cu tin cu paga tur luna, ademas di e material di scol cu nan tin pa haci nan les.

Di mesun manera, ta conoci cu algun hobennan y nan mayornan tin un situacion financiero dificil y pa esaki Kelly a declara cu nan ta papiando cu cierto organisacionnan of sponsornan pa ‘adopta’ e hobennan aki cu no tin e posibilidad pa paga pero cu si kier participa den e proyecto aki.