GED test lo ta e solucion?

Nos ministro encarga cu Enseñansa a trece dilanti un alternativa pa nos studiantenan cu no ta logra caba nan estudio secundario cu un diploma y por lo tanto no por sigui studia. E solucion ta un sistema di test Mericano, yama General Education Development (GED) cu a surgi tempo di Segunda Guera Mundial den forsa arma Mericano, cu tabatin mester di prueba standarisa pa test nan personal cu no a drenta servicio cu un diploma regular di high school. El a pasa den varios fase di refinacion y awendia ta un sistema reconoci na Merca y otro teritorio Mericano, y Canada. E ta actualmente un test completamente digitalisa cu mester haci en persona ( no online) den centronan specialisa y certifica pa esaki.

Un pakete di cuatro test ta forma e prueba total pa cual mester yega na un puntuacion minimo pa por haya e certificado. Tin test tambe specialmente diseña pa atende cierto limitacion fisico o mental cu e studiante por tin, manera solucion pa persona ciego, sordo, cu dislexia, desorden mental manera bipolar disorder o schizofrenia.

E testnan ta obtenibel na Ingles, Spaño y Frances, e dos ultimo nan aki solamente na Canada. E certificado por duna acceso na estudio avansa, pero no sin mas. Cierto institutonan ta pone como exigencia un score minimo cu e studiante mester tin pa por drenta. Tur e anterior aki ta mustra hopi positivo, pero ban mira kico ta loke e posibilidad aki ta bay resolve na Aruba. Aki nos tin un cierto cantidad di hoben cu no ta logra caba nan scol cu un diploma. Nos no tin cifra exacto riba nan, specificamente esunnan cu bandona scol prome cu drenta e aña di examen. Di aña 2013/2014 nos tin algun dato cu nos por uza.

A haci examen MAVO, HAVO y VWO un total di 1158 alumno, di cual 665 di MAVO, 363 di HAVO y 130 di VWO. Tambe tabatin 25 dropout durante aña di examen mes. A faya nan examen un total di 353 alumno, di cual 219 di MAVO, 109 di HAVO y 25 di VWO. Nos no tin informacion cuanto di nan lo por a purba un biaha mas pa logra nan diploma regular, y cuanto definitivamente mester busca otro manera pa construi un futuro pa nan mes.

Pa cuminsa, e grupo grandi di MAVO probablemente tin poco posibilidad pa logra un certificado di GED. E motibo ta cu e GED ta orienta riba nivel ‘high school’ y esey no ta wega. Na Merca mes normalmente 30% di esunnan cu haci e test, ta faya. E argumento cu e test na Ingles por faborece nos alumnonan cu ta sinti nan mes mas comodo cu Ingles, esey tin algo di berdad di un banda, y di otro banda no. No ta pasobra e dominio di Hulandes na nos scolnan ta simplemente pesimo, no tin otro palabra pa e cos aki, esey lo implica cu e Ingles di e mayoria di e alumnonan lo ta suficiente. Naturalmente gran parti di nos hubentud ta biba riba nan smartphone, pero e vocabulario basico di

Facebook/Twitter ey no ta yuda ora bo mester bay haci un estudio avansa na Ingles. Den e mundo aki ta keda asina cu ‘cos cu bo no lesa, ta cos cu bo no sa’! Un bon desaroyo personal pa cualkier persona awendia ta implica cu e sa con e ta bay riba internet, haya e informacion cu den mayoria di caso ta disponibel, anto ta aplica esey den e caso concerni. Pero esey ta implica cu bo mester por comprende un base minimo di e materia cu bo ta tratando di domina.

Por lo tanto nos ta mira caba cu e proyecto aki ta mayoritariamente un alternativa pa esunnan di HAVO y VWO cu a pega den nos sistema, plus esunnan cu a drop out poco prome cu nan a caba scol. Un grupo potencial anto di alrededor di 150 studiante (pa aña). Suficiente pa ‘give it a try’? Esey ta depende di e recursonan cu gobernacion ta desea di inverti den e proyecto aki. Y, bo tin un certificado Mericano, cu su bon y su malo.

E problema cu a keda benta riba mesa ta, y nos a yega di toca e tema aki mas biaha, cu aki nos ta purbando atrobe di remedia cosnan na final di e proceso, cu a cuminsa bay robes na inicio caba. Atrobe nos no ta purba di atende e problema di nos carencia di calidad den enseñansa garando e toro na su cacho, pero na e otro banda. Pa hopi aña e formacion intelectual den henter e proceso di enseñansa basico ta marca e pauta (negativo) pa loke ta bin despues. E ultimo añanan nos por a presencia henter e pleito entre Colegio Arubano y e mandatario tocante aumento di clemencia den acceso di alumnonan di MAVO na HAVO.

Un problema insignificante si nos observa e catastrofe den nos scolnan basico , cu tin su consecuencia despues den tur scol cu ta bin despues. Atrobe, nos ta kere cu mester defini prioridad prome, pa despues tuma accion, efectivo.