WILLEMSTAD – Ideal lo tabata pa e profesionalnan di cuido y e aseguradonan di cuido yega na un acuerdo y convenio di prijs pa loke ta trata dunamento di prestacion y con e tarifanan relaciona cu esakinan ta formula y consisti. Finalmente ta trata pa yega na un sistema di pago cu ta cuadra cu realidad di cuido den practica.
Mientrastanto e aumentonan drastico di e tarifanan di Sehos ta den foko di noticia. Asina ta cu e gastonan pa drumi den hospital a subi entrante 1 di april di e aña aki cu 85%. Aunke un aumento di e tarifanan ta hustificabel, Guardian Group Fatum ta lamenta e aumento gigantesco aki. Ademas ta cuestionabel si Sehos por aumenta e tarifanan aki. Por lo tanto nos ta di opinion cu e tempo ey e ordenansa insular di 2009 (AB 2009, no. 68) cu ta stipula e gastonan pa drumi den hospital y e tarifanan adicional di Sehos te ainda ta vigente. E areglo aki ta for di 10/10/10 i pues ta sigui ta valido pa pais Corsou. Si Sehos ta haya necesario pa aumenta su tarifanan e ora ey e areglo aki mester keda revoca prome segun e trayecto cu ta stipula esaki. Guardian Group Fatum tambe lo notifica Sehos cu e ta di opinion cu e aumento di tarifa aki, aworaki no ta realisabel.
Aparte di esaki, introduccion di e seguro basico entrante 1 di februari 2013 a conduci cu casi tur e personanan aspirante (hoben) ta sigura abase di e seguro basico di gobierno cerca SVB y cu pa e motibo ey e aseguradonan particular di gastonan di enfermedad na Corsou ta cubri solamente 10% di e mercado. P’esey e mercado pa e asegurado particular di gastonan di enfermedad cada be ta mas bou di presion. Entretanto e aseguradonan ta purba conhuntamente ya pa basta tempo di haya un combersacion cu ministerio di Salubridad, Medio Ambiente & Naturalesa pa den consulta cu gobierno yega na un solucion pa e situacion aki. Por lo tanto lo ta posibel adapta e ley pa asina no solamente SVB sino tambe e aseguradonan particular por ofrece un pakete basico pa e gastonan di enfermedad y cu tur hende por cera un seguro cerca e aseguradonan aki. Asina aki ta crea hopi posibilidad pa scoge pa e asegurado y por competi abase di servicio y calidad. Manera efectivamente e sistema di cuido ta funciona na Hulanda. Ainda nos no a nota un posicion concreto di gobierno encuanto esaki. Guardian Group ta sigui e desaroyonan di e seguro di gastonan di enfermedad na Corsou y ta spera riba un solucion satisfactorio pa tur esunnan envolvi.
