Den un conferencia di prensa di ayera mainta minister di Finansa y Cultura Xiomara Maduro a trece dilanti un splicacion riba finansa publico unda el a duna detaye pa loke ta trata presupuesto di pais Aruba pa e aña aki.

Pa cuminsa el a papia tocante cifranan cardinal di presupuesto y cambionan cu a resalta den comparacion cu presupuesto di aña pasa y un splicacion di e necesidad financiero pa cu e aña aki, ademas di conseho di CAft y e contesta cu Gobierno di Aruba a duna.

Pais Aruba lo conta cu un entrada premira di 1.275 miyon florin y un gasto di 1.566 miyon florin, den esaki pa loke ta gasto di personal ta premira 438 miyon florin, servicio y producto 226 miyon florin, di interes 266 miyon florin, subsidio 212 miyon florin, di impuesto indirecto nan lo haya 481 miyon florin, di impuesto indirecto 551 miyon florin, cu un inversion di 37 miyon florin, fiansa pa estudio di 26 miyon florin na unda nan lo tin un necesidad financiero di 1.305 miyon florin cu un deficit financiero pa e aña aki ta -291 miyon florin cual ta 5.2% di GDP.

E cambionan cu a resalta den esaki compara cu presupuesto 2021, pa loke ta trata gasto di personal ta subi cu 8 miyon florin debi na cu gobierno a premira pa por paga back e 50% e recorte di 12.6% y pa haci esey e suma di gastonan di personal lo subi na e cifra ey.

Pa loke ta trata servicio y productonan, Maduro a comenta cu den aña aki esey a subi cu 26 miyon florin debi na un escogencia di maneho na unda el a sigura cu lo por introduci un Family Justice Center, tambe pa por lanta un Bureau Cannabis y tambe un Directie Innovatie, ademas pa cubri gastonan di proyectonan PPP cu tur aña ta subi.

Pa lo cual ta gastonan di interes, esey tambe ta premira pa subi na 8 miyon pa motibo cu tin un suma di 1.014 miyon florin cu mester wordo financia e aña aki.

E parti di subsidio a subi na 10 miyon florin segun loke Maduro a indica pa motibo di pago di 50% di lo cual ta e recorte pa 12.6% cu gobierno tin pensa di haci e aña aki.

Impuesto directo a subi cu 64 miyon florin na unda cu Maduro a expresa cu esaki ta e efecto ora ta haci e pago back di 50% di e recorte di 12.6% ta haya e ora ey un loonbelasting cu ta premira pa por drenta y tambe pa e hecho cu a stop e sosten financiero.

Impuesto indirecto tambe lo subi cu 42 miyon florin pa via di un mehoracion economico na pais Aruba.

Pa lo cual ta inversion, esey ta premira di subi cu 16 miyon florin na unda cu ta dirigi pa trabounan urgente na e planta di awa RWZI (rioolwaterzuiveringsinstallatie), unda el a splica cu e proyecto mes ta un proyecto grandi y cu gobierno mes no tin e fondonan cu ta 60 miyon florin pa un planta nobo, pa e momentonan aki lo ta un solucion provisional.

Tocante fiansa di estudio, Maduro a comenta cu esey a keda mesun cos.

Entrada ta premira di subi cu 162 miyon, e gastonan ta bira 120 miyon florin menos door cu ta stop sosten financiero na unda ta hiba Aruba na un necesidad financiero di 112 miyon florin y un deficit di menos 295 miyon florin.

Asina mes, el a trece dilanti cu necesidad financiero total pa cubri tur gasto di aña 2022 ta di 1.651 miyon florin, pa cubri servicio di debe cu ta suma 1.360 miyon florin unda cu e suma aki ta consisti di debe internacional cu tin cu paga 346 miyon florin, e debe cu Aruba tin cu Hulanda pa Covid-19 di 904 miyon florin y tambe tin un debe local di 110 miyon florin, banda di dje tambe tin e deficit di 291 miyon florin na unda nan tin cu busca e suma aki sea via Hulanda of na mercado local.

Pa cubri e necesidadnan financiero aki, Maduro a splica cu e debe internacional cu Aruba tin 346 miyon florin na unda cu na luna di september di aña pasa Hulanda a presta Aruba 523,1 miyon florin pa asina por paga e debe internacional di 2021 cu ta ekivalente di 177,1 miyon di 2021 y 346 miyon di 2022, e aña aki Aruba ta cubri e parti aki segun loke Maduro a enfatisa.

E debe cu Hulanda pa Covid-19 di 904 miyon florin, Aruba a cuminsa delibera cu Hulanda pa por refinancia e debe aki cu na april 2022 ta madura.

Di loke ta trata e debe local di 110 miyon florin, esaki conforme cu palabracionnan cu Hulanda Aruba mester refinancia esaki riba mercado local.

Esaki ta nifica cu Gobierno lo mester busca e aña aki 1305 miyon florin pa asina tin fondonan pa cubri e debe cu Hulanda si esey no lo wordo refinancia, e debe local cu Aruba tin y tambe e deficit pa asina por implementa lo cual ta presupuesto di aña 2022.

Maduro tambe a expresa cu prome cu presupuesto aki lo bay pa Raad van Advies, CAft ta haya un bista riba dje na unda cu dia 29 di november di 2021 CAft a duna su conseho y gobierno a reacciona dia 20 di december, di esaki CAft ta duna seis punto cu ta, baha gasto di servicio y producto na nivel di 2020, kita 50% di recorte di 12.6%, caba control di subsidio di salario prome cu 1 di april y hinca e suma ey den presupuesto 2022, duna un bista financiero di cambio fiscal den Landspakket, kita e rebaho di 2% di loonbelasting duna for di januari 2021 y splica e inversion di 16 miyon na RWZI.

E reaccion di gobierno pa cu esaki ta, conseho di baha gasto di servicio y producto na nivel di 2020 y kita e recorte di 50% di e 12.6% gobierno no lo tuma, conseho pa caba cu control di subsidio di salario q di paril di 2022 y splica inversion na RWZI, gobierno a haci’e caba prome cu nan a manda e presupuesto na Raad Van Advies y di duna bista financiero riba cambio fiscal y kita e rebaho di 2% di loonbelasting lo wordo haci despues di e nota di cambio, manera Maduro a sigura.

Den e conferencia di prensa aki, Bon Dia Aruba a haci un pregunta na minister Maduro unda cu a puntra: Presupuesto ta di practicamente 300 miyon deficit, un placa cu mester fia, ainda ta duna bashi premie na empleadonan publico y kier corta e reduccion di 12,6% na mita, gobierno ta consciente di e hecho cu ta fia placa pa mantene privilegio di empleado publico?

Pa cu esaki, minister Maduro a manifesta cu e presupuesto tin un deficit di 291 miyon florin, banda di dje tambe tin debenan cu tin cu wordo paga, e necesidad financiero e aña aki kitando loke a cubri ta core den 1.300 miyon florin si ta tuma na cuenta e 904 miyon cu mester paga na Hulanda na april di e aña aki, “ta sumanan halto cu ta indica tambe e situacion precario di e situacion financiero di pais Aruba, pero Gobierno di Aruba na cuminsamento di pandemia a keda cu su responsabilidad pa por cumpli cu tur lo cual ta su debernan y den e caso aki cu a paga e bashi premie esaki tambe ta un di e debernan cu gobierno tin aparte di tur e otronan”, el a bisa.

Ademas di esey, el a trece dilanti cu esaki no ta un privilegio, e ta lo cual empleado publico mester a haya conforme e protocol firma na 2014, “a pesar di mira e cifranan, ta bon pa hendenan ta consciente y vooral sindicatonan cu ta duna expresion manera cu gobierno ta un mal dunado di trabou, cu no ta cumpli, siendo cu den situacion precario cu nos ta, gobierno a cumpli”, el a finalisa.