For di e ultimo reportahenan financiero di fin di aña di gobierno di Aruba (Kwartaalrapportage 4-2019) y comparacion cu e mesun documento di e añanan anterior (2017 y 2018), por conclui cierto tendencia den desaroyo di e cantidad di empleado cu gobierno tin na trabao y e gastonan cu esaki ta trece cune.
Manera e cifranan den e tabelnan aki bao ta indica, tabatin un tendencia di cada vez menos personal emplea pa gobierno, comparando cifranan di fin di aña 2017, 2018 y 2019, loke riba su mes ta un desaroyo positivo.
Por conclui di e tabelnan aki cu, pa loke ta e ministerionan, tin un tendencia di reduci personal emplea, manera ta visible entre 2018 y 2019, unda e ministerionan a termina 2019 cu 80 cupo di trabao full time menos cu na 2018, mientras e gastonan total ta keda mas o menos mescos. Esaki tin su splicacion den e hecho cu cada aña, hasta si no emplea ningun persona mas, e gastonan di personal tin tendencia di aumenta, a base di promocion y e sistema di pago di ‘periodiek’ loke ta aumenta e volumen di salario, y ta aumenta tambe e volumen di e obligacionnan como dunador di trabao cu gobierno tin. Conclusion ta, cu si lo kier baha gasto di payroll, anto lo mester reduci mas ainda e cantidad di cupo di trabao.
Otro gastonan di personal.
For di e resumen cu Fondo Monetario Internacional (IMF) a traha recientemente di tur loke ta considera gasto di personal, y cu ministerio di finanzas a publica algun tempo pasa, por deduci cu (pa 2018) gobierno ta pagando hopi mas salario cu e total di 4743 pa fin di 2019. Ta yega na un total di 7195 persona. Mester bisa acerca si cu e cifranan di gobierno den nan reportahe ta basa riba ‘fulltime jobs’: e asina yama Functie-taakeenheden (FTE’s). Esaki logicamente ta duna un diferencia cu e cantidad di persona emplea, full time o part time.
En total, pa e ministerionan, seguridad publico incluyendo kustwacht, IMF ta yega na un total di 5021 persona emplea. E cifra aki ta inclui tambe e 624 personanan cu ta den areglo di VUT o ta trahando pa un uitzendbureau den trabao temporal, aunke den e tabel duna pa gobierno nan no ta aparece. No ta conoci con e reparticion ta entre persona saliente di servicio publico y persona emplea via uitzendbureau.
Pa loke ta e total di gasto di personal manera identifica pa IMF, esaki ta yega na Afl. 677 miyon, loke ta inclui e gastonan di personal di sector subsidia, tanto di enseñansa no publico y sector di fundacion involucra den trabao social y similar. Esaki ta como Afl. 200 miyon mas cu e suma acorda cu CAft, mientras ta trata di gasto di salario pa cual gobierno no por sconde, aunke e ultimo categorianan aki no ta ambtenaar. Como cu di e manera aki ta dificil haci comparacion con den su totalidad e peso di gasto di personal ta afecta gobierno su estado financiero, ta recomendable pa cuminsa pasa pa haci e resumen manera IMF ta entrega esaki, pa por tin un vista mas realistico di e materia aki.
