Segun minister di financia y economia, Xiomara Ruiz-Maduro, gobierno ta haciendo esfuerso pa baha e gasto di personal cual ta esun cu tin mas peso riba nos presupuesto. Nan a introduci diferente instrumento pa haci esaki posibel. Sinembargo, aunke e gasto di personal ta bahando, e no ta bahando di un forma significativo ainda. E ta un tema cu e mandatario a cualifica como uno cu ta mas complica di loke nos por imagina.

E cifra reciente cu e mandatario a presenta ta mustra cu e gasto aki a baha cu 1% den e prome kwartaal di presupuesto 2019. E mandatario ta splica cu pa baha gasto di personal esaki ta nifica cu e aparato publico tin cu bira menos. “Es decir mas hende tin cu sali afo cu hendenan por drenta aden”, el a declara.

E mandatario a agrega cu nan ta atendiendo cu e asunto di personal, pero esaki mester ta un proceso conhunto. Gobierno ta hayando critica tambe for di sector priva riba nan gasto di personal cu ta mucho halto, y e ta reconoce cu ta berdad. Pero e punto ta con sector priva ta disponibel pa traha hunto cu gobierno pa e hendenan cu su contract no ta wordo prolonga den gobierno por haya un trabou cerca nan. Pero tambe cu e empleado aki por haya un salario corecto.

Decision no facil
Contestando pregunta di Bon Dia Aruba riba e tema aki, e ta haya cu mester papia cla riba asunto di personal den gobierno. Segun minister, pa prome biaha den historia, gobierno di Aruba a traha un plan con lo bay atende cu e problema aki. E ta haya cu gobierno tin boluntad, pero tin un parti di decision cu no ta uno facil, ya cu Aruba no ta conta cu e fondo social manera Hulanda pa atende cu hendenan desemplea. No ta facil pa cuminsa gewoon reduci masalmente empleadonan di gobierno.

“Manda 300 hende cas y e ora ey nan no tin trabou, nan no tin entrada,” el a bisa. Pero e ta haya cu lo yega e momento cu e decision mester cay. A esar di e tipo di situacion aki, gobierno no por yuda cu esaki. No tur contract cu tin aworaki den gobierno lo wordo prolonga. Pues e hendenan mester cuminsa compronde esaki, pasobra pais Aruba mester traha espacio financiero.

Sinembargo e ta sinti cu ora e ta bisa esaki, e hendenan no kier compronde. Ya cu ora contract di personal ta vence y nan ta wordo bisa cu no lo wordo extende mas, gobierno ta wordo critica. Segun e mandatario, e no ta trece esaki di mal manera, pero esaki ta e realidad cu nos ta biba den dje.

Analisando brevemente e situacion aki, e mandatario ta mira cu den e sector priva aparentemente e hendenan no ta buscando trabou; of no tin trabou. Esaki ta trece cune cu e hendenan aki ta bin bati porta di gobierno. “Ora cu contract caba nan ta bin bisa bo: Si, pero e mester di e trabou ey pa e por provee pa su yiunan. Y nan ta argumento real!”

Mirando e situacion aki, minister Ruiz-Maduro ta sinti cu si e contract no ta wordo renoba, e persona ta bira un persona desemplea, si e no por haya otro trabou. Pero tras di dje ta bin un serie di critica tocante desempleo, muchanan jong no ta haya trabou, etc… Pero di otro banda e tata y mama ta bin cerca bo pa laga bo sa cu su yiu mester di un trabou.

Nan ta bin cu diferente argumento entre otro cu nan yiu ta studia, pero no ta hayando trabou den sector priva. Of den e sector aki nan kier page un salario minimo, mientras e yiu tin diploma universitario. E ta formula su mes e pregunta: “Kico bo ta haci den e situacion eynan?”