Ya caba prome minister, Evelyn Wever-Croes a anuncia cu decision dificil lo ta na caminda, pa gobierno por garantisa na prome luga e cuido medico di nos comunidad pa medio di seguro medico general.
Esaki mirando e exigencia cu Hulanda a haci pa entrega prestamo sin interes pa pais Aruba. Pero entre otro exigencianan, mester baha gasto di AZV cu 5 miyon florin.
Actualmente gobierno lo bin cu un plan a corto tempo pa sigui baha su gastonan pa garantisa cu FASE, subsidio di salario por wordo paga y sigui brinda ayudo pa esunnan mas afecta. “Nos ta bay mira con lo bay haci’e y ki decision mester wordo tuma pa por yega asina leu,” premier Wever-Croes a bisa.
El a sigura cu cualkier decision lo wordo tuma den conhunto, pero cu mira di sigui garantisa e servicio di e seguro medico, cu ta importante specialmente pa esunnan mas vulnerabel di nos comunidad.
Nan aproba e suma di 113.3 miyon florin pa e periodo di 15 di mei pa 3 di juli. E fiansa aki ta bira un alivio pa nos gobierno por cumpli den e transcurso di e 6 siman aki cu nan compromisonan, specialmente cu e sector priva y esunnan mas afecta di e sector aki, tanto trahadonan como e companianan.
“Gobierno di Aruba ta gradicido pa e asistencia aki,” el a bisa. Tambe el a agrega cu e prestamo aki tabata posibel danki na tur esnan cu a mustra nan solidaridad den e momento dificil aki, pa sigui brinda e ayudo aki na esnan mas afecta.
El a referi na empleadonan publico, trahadonan di instancia semi publico, fundacionnan subsidia pa gobierno. Tambe parlamentarionan y compania estatal, cu nan a bay di acuerdo pa entrega parti di nan salario.
Tambe el a referi na e dialogo tripartiet Social-Laboral, entre gobierno, pero muy specialmente entre gremionan comercial y sindical cu ‘a sa di haya otro’ pa asina por logra e facilidad di prestamo di Hulanda pa e siguiente 6 siman.
